Liderët europianë, të cilët shoqëronin Presidentin ukrainas Zelenski në Shtëpinë e Bardhë, kërkuan nga Presidenti Trump arritjen e një armëpushimi me Rusinë dhe garanci sigurie për Ukrainën pas arritjes së një marrëveshjeje.
Kryeministri britanik, Keir Starmer tha se garancitë e sigurisë dhe takimi tripalësh me Rusinë, Ukrainën dhe SHBA-në do të ishin një hap “historik” përpara. Nga ana e tij, Kancelari gjerman, Friedrich Merz theksoi nevojën për një armëpushim para çdo takimi me Rusinë, duke i thënë Trump: “Le të punojmë për këtë dhe le të përpiqemi të ushtrojmë presion mbi Rusinë”.
Gjithashtu, Presidenti francez, Emanuel Makron u bëri jehonë thirrjeve të Merz për armëpushim dhe i përshkroi bisedimet – si një çështje sigurie për të gjithë Evropën. Kryeministrja italiane Xhorxhia Meloni tha se nevojitej garanci që kjo luftë nuk do të ndodhte përsëri, që do të ishte një parakusht i çdo lloj paqeje.
Sekretari i përgjithshëm i NATO-s Mark Rute tha se aleatët duhet të bënin përpjekje për t’i dhënë fund shënjestrimit të infrastrukturës së Ukrainës. Ndërsa Presidentja e Komisionit Evropian, Ursula von der Leyen bëri thirrje që kthimi i fëmijëve të rrëmbyer ukrainas të ishte një përparësi kryesore, duke shtuar: “Si nënë dhe gjyshe, çdo fëmijë duhet të kthehet në familjen e vet”. “Mund të vij nga një vend i vogël, por kemi një kufi të gjatë me Rusinë – dhe mendoj se ka pasur më shumë progres në Ukrainë brenda dy javësh sesa në tre vitet e fundit”, ishin fjalët e Presidentit finlandez, Alexander Stub.
Leave a Reply