Presidentja meksikane, Claudia Sheinbaum mohoi se qeveria e saj ka ndonjë marrëveshje me Uashingtonin mbi një projekt dypalësh për të shkatërruar kartelet e drogës. Të hënën, Administrata Amerikane e Zbatimit të Ligjit për Drogën (DEA) njoftoi një “iniciativë të guximshme dypalëshe” me Meksikën për të luftuar kartelet e drogës, një iniciativë operacioni e quajtur “Projekti Portero”.
Megjithatë, Sheinbaum tha se Meksika nuk ishte konsultuar për këtë çështje.
“DEA lëshoi këtë deklaratë, nuk e dimë mbi çfarë baze”, tha Sheinbaum gjatë konferencës së saj të përditshme për shtyp.
“Nuk kemi arritur asnjë marrëveshje, nuk ka asnjë marrëveshje midis institucioneve tona të sigurisë dhe DEA-s”, shtoi ajo.
Sheinbaum shtoi se Ministria e Jashtme e Meksikës dhe Departamenti amerikan i Shtetit kishin punuar për muaj të tërë mbi një marrëveshje sigurie që është “gati për t’u nënshkruar”.
“Kjo marrëveshje bazohet në thelb në sovranitet, besim të ndërsjellë dhe respekt territorial… dhe koordinim pa nënshtrim”, tha ajo, duke shtuar se i vetmi aktivitet tjetër i vazhdueshëm dypalësh i sigurisë ishte një grup oficerësh policie meksikane që morën pjesë në një seminar në Teksas.
“Kjo është e gjitha që ekziston. Nuk ka asgjë tjetër”, vazhdoi presidentja duke shtuar se “nuk e dimë pse amerikanët e bënë këtë deklaratë”.
Leave a Reply