Një bisedë telefonike mes Presidentit turk, Recep Tayyip Erdoğan dhe Sekretarit të Përgjithshëm të #NATO-s, Mark Rute, ka zyrtarizuar vendin dhe datat e zhvillimit të Samitit të Krerëve të Shteteve e Qeverive të Vendeve Anëtare të Aleancës vitin e ardhshëm në Turqi
.
NATO njoftoi zyrtarisht se Samiti do të zhvillohet më 7-8 korrik 2026 në Kompleksin Presidencial, në lagjen Bestepe në Ankara.
Zgjedhja e Turqisë si pritëse e Samitit 2026 u vendos në Samitin e shkuar në Hagë në fund të qershorit 2025. Megjithatë për zyrtarizimin e datës, Sekretari i Përgjithshëm i NATO-s ka bërë edhe një xhiro konfirmimesh me 32 vendet anëtare për të shmangur përplasjet me aktivitete apo angazhime të tjera të liderëve që do të udhëtojnë drejt Ankarasë.
Në ndryshim nga Haga (Holandë), ku me kërkesë të delegacionit amerikan mbledhja u përqendrua vetëm në një ditë (paraprirë nga një darkë me ftesë të Familjes Mbretërore), Samiti do të rikthehet sërish vitin e ardhshëm në formatin klasik dyditor, ndonëse mbetet të përcaktohen shumë detaje të zhvillimit të tij.
Gjeografikisht Samiti i NATO-s do të zhvillohet në kontinentin aziatik, ndërsa është evituar Stambolli, me shtrirje në të dy kontinentet.
Në aspektin e sigurisë, Kompleksi Presidencial në Ankara duket se i plotëson të gjithë kërkesat e një samiti të tillë, për shkak të pjesëmarrjes së Presidentit amerikan dhe drejtuesve të tjerë të shteteve e qeverive.
Në aspektin logjistik, kompleksi me mbi 1100 dhoma dhe që zyrtarisht kushtoi rreth 615 milionë dollarë, ka të gjitha sallat e nevojshme për samitin dhe punën e stafeve e medias.
Samiti i vitit 2027 të Krerëve të Shteteve e Qeverive të Vendeve Anëtare të NATO-s do të zhvillohet në Shqipëri.
Leave a Reply