Një rritje dramatike e sulmeve të Ukrainës kundër rafinerive të naftës e ka rritur çmimin e karburanteve në Rusi në vlera rekord, megjithëse qeveria e Moskës ka ndërhyrë duke ndaluar eksportet jashtë vendit për të përballuar nevojat e brendshme. Prej disa ditësh, Ukraina e përqendruar flotën e saj të dronëve që veprojnë në territorin rus për të goditur rafineri, stacione furnizimi dhe trena e transportit, duke synuar të dëmtojë makinerinë ruse të luftës.
Taktika e re e Kievit synon gjithashtu të ndikojë në jetën e përditshme të rusëve, ndërsa gjatë verës verifikohen gjithnjë kërkesat më të larta për karburant nga shoferët dhe fermerët.
Sipas raportimeve të shtypit ndërkombëtar, dronët ukrainas kanë goditur vetëm gjatë muajit gusht 2025, të paktën 10 sipërmarrje kyçe në fushën e energjisë. Kjo strategji duket se po jep edhe rezultate konkrete. Sipas shërbimit inteligjent të Ukrainës, rafineritë e goditura prodhojnë në vit më shumë se 44 milionë ton produkte të naftës, një shifër që i afrohet 10 % të kapacitetit prodhues të vendit.
Midis objektivave të sulmeve të ideuara në Kiev ka qenë edhe rafineria në Volgograd e gjigandit të karburanteve “Lukoil”, që vlerësohet të jetë më e madhja në jugun e Rusisë. Ndaj saj janë realizuar dy sulme, të pranuara edhe nga Ministria ruse e Mbrojtjes.
Gjithashtu në jug të vendit, në Saratov, u godit një rafineri e madhe në fillim të gushtit, ndërsa flakë janë vërejtur, sipas medias ndërkombëtare, edhe në një tjetër rafineri në Rostov, edhe dy ditë pas goditjes së saj.
Situata e krijuar ka sjellë probleme në furnizimin me karburant në disa rajone të Rusisë, përfshirë edhe Krimenë e aneksuar. Megjithë furnizimet shtesë nga qeveria, konsumatorët rusë po paguajnë më shumë edhe në pikat e shitjes me pakicë. Në Shën Petersburg, vetëm këtë muaj benzina kushton 10 % më shumë dhe prej fillimit të vitit 50 % më shumë.
Makineria ushtarake ruse mbetet ndërkohë më pak e prekur, pasi ajo konsumon naftë në pjesën më të madhe të saj.
Ushtria ukrainase dhe shërbimet inteligjente deklarojnë se e kanë shtrirë goditjen me dronë edhe me një rreze të gjerë brenda Rusisë, duke arritur deri në 500 km brenda territorit të saj, me synim goditjen dhe sabotimin e ekonomisë ruse. Sipas tyre, vetëm gjatë këtij viti janë shkaktuar dëme me vlerë rreth 74 miliardë dollarë. Megjithatë për shtypin ndërkombëtar këto të dhëna është e vështirë të verifikohen, ndërsa Rusia vuan edhe nga sanksionet ekonomike.
Leave a Reply