Qeveria e re dhe 3 vektorët e formatimit

Nga Elton METAJ

Nisja e vjeshtës dhe shirave të rrëmbyeshëm ka ulur temperaturat dhe ka pastruar ajrin nga pluhuri, por ka “shtuar” ankthin dhe paqartësinë te klasa politike në përgjithësi dhe shumica e majtë në veçanti. Në pritje se çfarë do të vendosë Kryeministri për qeverinë e re, merkato e emrave është e shoqëruar edhe me një përpjekje për të lexuar mes rreshtave veprime apo deklarata të Edi Ramës. Një përpjekje deshifrimi me shkallë të lartë vështirësie, pasi shefi i socialistëve ka dëshmuar se elementin surprizë, veçanërisht për emrat e ministrave, e kultivon me fanatizëm dhe askush nuk mund t’ia vjedhë nga “çanta e sekreteve”.

Megjithatë ka disa elementë mbi të cilët mund të ndërtohet një strukturë analitike mbi formatimin e qeverisë së re. Duke analizuar këta vektorë që mund të ndikojnë vlerësimin dhe gjykimin e Kryeministrit, mund të parashikohet edhe shkalla e ndryshimeve në qeverinë e re.

Së pari, vektori historik – Gjatë 12 viteve në pushtet, Edi Rama ka formuar 3 qeveri dhe ka ndryshuar disa të tjera. Megjithatë me trupën e ministrave që ka ftuar të ulen në tryezën e qeverisë, Rama është treguar konservator. Në 3 mandatet e shkuara, lideri i shumicës nuk ka preferuar përmbysje të mëdha apo zbrazje masive të sallës në katin e dytë të selisë së qeverisë, nuk ka larguar ministra për shkak të pakënaqësive publike të nxehta, por ka pritur momentin për të vepruar gjakftohtë. Ka realizuar disa herë spostime brenda kabinetit, ka ulur ministra në stol dhe i ka rifutur në fushën e betejës. I vetmi moment kur Edi Rama mori fshesën ndaj të tijve ishte fundi i vitit 2018. Pas protestës së studentëve, u dërguan për “riedukim” Lindita Nikolla, Arben Ahmetaj, Ditmir Bushati, Damian Gjiknuri, Niko Peleshi, Mirela Kumbaro Furxhi e Sonila Qato. Sot Edi Rama nuk ka asnjë presion të ngjashëm apo të krahasueshëm me 2018-n.

Mbështetur në vektorin historik, pritshmëria është për NDRYSHIME TË VOGLA.

Së dyti, vektori i aktualitetit – Mesi i shtatorit, kur Kryeministri do të shpallë qeverinë e re, shënon edhe mbylljen zyrtare të mandatit të tretë në pushtet. Një moment perfekt për një analizë performance të anëtarëve të kabinetit për të evidentuar kush e meriton dhe kush jo të qendrojë në anije. Në anën tjetër, i treti ka qenë një mandat i qetë për socialistët, në vendimmarrje dhe në Kuvend për shkak të shumicës solide, por i ndërthurur edhe me aktivizimin dhe nisjen e punës së Prokurorisë së Posaçme. Ndër radhët e socialistëve ka patur “viktima” VIP, si Ahmetaj e Veliaj, ndërsa SPAK-u vijon hetimet për një seri çështjesh të tjera të lidhura me strukturat e ekzekutivit. Në këtë kuptim, Edi Rama nuk ka asnjë arsye të marrë me vete në mandatin e katërt problematikat e mandatit të tretë, qofshin këto në mungesë performance të ministrave të caktuar apo dyshime për “ngecjen” e tyre në rrjetën e hetimeve penale.

Mbështetur në vektorin e aktualitetit, pritshmëria është për NDRYSHIME TË NDJESHME.

Së treti, vektori i ardhshmërisë – Në mënyrë intensive dhe këmbëngulëse gjatë fushatës së fundit zgjedhore dhe së fundmi mes qetësisë që të ofron Bledi i Sllovenisë, Kryeministri Rama ka nënvizuar se fokusi i mandatit nr.4 do të jetë Bashkimi Europian. Shqipëria po tregohet agresive në përpjekjen e saj për të mbyllur pjesën teknike të anëtarësimit në BE deri në vitin 2027, me synimin për të “futur në xhep” miratimin e Komisionit Europian. Më pas, do të ketë një vals të gjatë diskutimesh në kancelaritë e vendeve anëtare, ku gjykimi anon më shumë nga arsyet politike se ato teknike. Ndaj vendimet e sotme të drejtuesit të ekzekutivit, shtimi ose jo i teknikëve në kabinet, do të thonë shumë se si do të projektohet qeverisja dhe si do t’i qaset ajo sfidës kryesore: plotësimit të standardeve e kërkesave për marrjen e “dritës jeshile” nga ndërtesa “Berlaymont” në Bruksel, ku ngrysen zyrtarët e BE-së.

Mbështetur në vektorin e ardhshmërisë, pritshmëria është për NDRYSHIME TË NDJESHME.

Mes këtyre vektorëve ndikues dhe padyshim arsyeve e rrethanave të tjera, Kryeministri pritet të shpallë një ndër kabinetet më misteriozë të dekadës së fundit. Me shumë gjasë në tryezën e tij ndodhet tashmë, jo vetëm një skicë e asaj që do të shpallet fundjavën e ardhshme, por një panoramë e plotë e Ekipit Nr.4 dhe sfidave të tij.