Të akuzuarit për kanosje ndaj Kurtit deklarohen të pafajshëm

Të akuzuarit për kanosje me jetë ndaj kryeministrit në detyrë, Albin Kurti, Faton Klinaku dhe Nuredin Selmani janë deklaruar të pafajshëm në seancën e shqyrtimin fillestar. Gjykatësi tha se konform Kodit të Procedurës Penale, meqenëse nuk ka pranim të fajësisë, njofton mbrojtësit e të akuzuarve, avokatët Ramë Dreshaj dhe Labinot Vata, se për një afat prej 30 ditësh mund të paraqesin kundërshtim të provave.

Kryeministri në detyrë, Albin Kurti, ishte i pranishëm në Gjykatën Themelore në Prishtinë, ku u mbajt shqyrtimi fillestar në çështjen gjyqësore ndaj Faton Klinakut, i cili akuzohet për kanosje ndaj tij.

Prokuroria Speciale e Kosovës ka ngritur aktakuzë ndaj Faton Klinakut për veprën penale “Kanosja”. Gjithashtu, aktakuza është ngritur edhe ndaj një të pandehuri tjetër, N.S., është bërë e ditur në një njoftim zyrtar.

“Sipas aktakuzës, më 29.08.2023, i pandehuri F.K., me qëllim që ta frikësojë dhe ta detyrojë personin zyrtar – tani të dëmtuarin A.K. – në cilësinë e tij si kryeministër i Republikës së Kosovës, që të ndërmarrë ose të mos ndërmarrë veprime të caktuara në kuadër të ushtrimit të detyrës së tij zyrtare, e ka kanosur atë përmes profilit të tij personal në rrjetin social ‘Facebook’, duke postuar shkrime me përmbajtje kërcënuese,” ka njoftuar Prokuroria.