Një dron i lëshuar nga rebelët Houthi në Jemen goditi dje aeroportin ”Ramon” në Izraelin jugor, njoftuan sot ushtria izraelite dhe Autoriteti i Aeroporteve të Izraelit, sipas CNN. “Nuk u dëgjuan sirena”, thanë Forcat e Mbrojtjes së Izraelit (IDF), duke shtuar se incidenti ishte nën shqyrtim.
Është e rrallë që sirenat të mos paralajmërojnë për predhat që vijnë në Izrael, i cili ka një sistem shumështresor për t’u mbrojtur kundër raketave dhe dronëve.
Shumica dërrmuese e dronëve të lëshuar nga Houthi në Jemen janë interceptuar përpara se të godisnin Izraelin.
Forcat Ajrore Izraelite thanë se një hetim fillestar tregoi se droni ishte zbuluar, por nuk ishte klasifikuar si armiqësor, duke i lejuar atij të fluturonte përmes mbrojtjes ajrore. “Nuk ka asnjë tregues të mosfunksionimit teknik në sistemet ekzistuese të zbulimit”, tha ushtria në një deklaratë, duke shtuar se pritet një “hetim i gjerë”.
Një zëdhënës i Autoritetit të Aeroporteve të Izraelit tha se hapësira ajrore jugore mbi Aeroportin Ramon ishte mbyllur për trafikun ajror pas incidentit, dhe ishte rihapur pas rreth 90 minutash.
Aeroporti Ramon është një nga aeroportet e pakta ndërkombëtare në Izrael, që kryesisht i shërben qytetit të Eilatit në skajin jugor të vendit në Detin e Kuq.
Forcat e Armatosura të Jemenit të kontrolluara nga Houthi lëshuan një deklaratë pas sulmit duke paralajmëruar linjat ajrore se aeroportet brenda Palestinës së pushtuar nuk ishin të sigurta dhe se do të ishin vazhdimisht nën shënjestër.
Izraeli dhe Houthi janë përfshirë në një konflikt afatgjatë në rritje që kur grupi rebel i mbështetur nga Irani filloi të synonte Izraelin – në atë që udhëheqësit e grupit e quajnë solidaritet me palestinezët në Gazë.
Leave a Reply