Ministri i Jashtëm iranian, Abbas Araghchi, njoftoi se aksesi i inspektorëve të Agjencisë Ndërkombëtare të Energjisë Atomike (IAEA) në objektet e saj bërthamore do të ishte e kufizuar pavarësisht marrëveshjes së arritur në Egjipt.
“Teherani do të lejojë aksesin vetëm në centralin bërthamor të Bushehrit në Iranin jugor”, tha Araghchi.
Deklarata e kryediplomatit iranian ndryshon nga marrëveshja e arritur të martën midis Iranit dhe mbikëqyrësit bërthamor të OKB-së, në Kajro – për rifillimin e inspektimeve të IAEA-s në vende të caktuara – duke përfshirë inspektimet në sulmet e fundit nga Izraeli dhe Shtetet e Bashkuara të Amerikës.
Marrëveshja e Kajros u arrit midis Araghchi dhe drejtorit të përgjithshëm të IAEA-s, Rafael Grossi – përmes bisedimeve të ndërmjetësuara nga ministri i Jashtëm egjiptian Badr Abdel-Atti.
Në qershor, Izraeli zhvilloi një luftë 12-ditore kundër Iranit dhe sulmoi objektet bërthamore të vendit, duke përfshirë edhe vendndodhjen nëntokësore “Fordow” në jug të kryeqytetit, Teheran.
SHBA-ja, më vonë iu bashkua sulmeve dhe bombardoi tre objekte kryesore bërthamore, përfshirë “Fordow”.
Konflikti erdhi mes një mosmarrëveshjeje të gjatë mbi programin bërthamor të Iranit, për të cilin Teherani këmbëngul se është paqësor.
Marrëveshja bërthamore e Vjenës e vitit 2015 midis Iranit dhe gjashtë fuqive botërore – Kinës, Francës, Gjermanisë, Britanisë së Madhe, Rusisë dhe SHBA-së – kufizoi programin bërthamor të Iranit në këmbim të lehtësimit të sanksioneve.
Leave a Reply