Në drejtimin e Vasil Llajos, si deputeti më i vjetër në moshë i parlamentit të ri, u çel ditën e sotme (e premte) seanca konstituive e Legjislaturës së XI-të e Kuvendit të Shqipërisë.
“Sot, sipas Kushtetutës, më është besuar detyra për të hapur këtë seancë. Ky është një moment solemn, sepse këtu fillon kapitulli i katër viteve të ardhshme, ku do të shkruhet historia e vendit tonë,” u shpreh Llajo.
Në këtë mbledhje të parë morën pjesë edhe përfaqësues të trupit diplomatik, si edhe krerët komuniteteve fetare.
Gjatë kësaj seance, Llajo sipas rregullores, bëri me dije emrat e sekretarëve të përkohshëm të Parlamentit si anëtarët më të rinj të tij, përkatësisht Marjana Koçeku, Zegjine Çaushi dhe Klodiana Çapja, të cilët do të bëjnë verifikimin e mandateve të ardhura nga KQZ.
Deputetët e opozitës kundërshtuan sërish rezultatin e zgjedhjeve dhe akuzuan shumicën për manipulime.
Pas verifikimit të mandateve, po ditën e sotme në orën 17:00, do të mbahet seanca e betimit të deputetëve dhe zgjedhja e Kryetarit të Kuvendit.
Leave a Reply