Në Gjykatën Themelore në Prishtinë, Jelena Gjukanoviç, nuk e pranoi fajësinë, ndonëse akuzohet se ka kryer veprime të përsëritura duke siguruar dokumente dhe informacione të ndjeshme për Agjencinë e Inteligjencës dhe Sigurisë së Serbisë. Në Gjykatën Themelore në Prishtinë, filloi gjykimi i Jelena Gjukanoviçit, punonjëse e OSBE-së, e akuzuar për spiunazh. Gjukanoviç, e cila është në arrest nga 28 shkurti, akuzohet nga Prokuroria Speciale se ka siguruar dhe ka shpërndarë dokumente dhe informacione të ndjeshme për Agjencinë e Inteligjencës dhe Sigurisë së Serbisë.
Gjatë leximit të aktakuzës, prokurori Bekim Kodraliu bëri të ditur se Gjukanoviç, me vetëdije ka përsëritur veprimin për të informuar Agjencinë e Inteligjencës në Serbi, me informacione të siguruara gjatë ushtrimit të detyrës së saj si zyrtare në kuadër të aktivitetit të Misionit të OSBE-së në Kosovë.
Ajo akuzohet edhe se ka ndikuar nëpër raporte të OSBE-së, të dedikuara për pasqyrimin e situatës politike dhe të sigurisë, duke kontribuuar në krijimin e një narrative armiqësore ndaj institucioneve të sigurisë.
Prokuroria vë në pah se me këto veprime që Gjukanoviç ka marrë udhëzime nga tani i dënuari për spiunazh Aleksandër Vllaiç dhe zyrtarët e tjerë të BIA-s, ka cenuar rëndë rendin kushtetues dhe sigurinë kombëtare, si dhe ka vënë në rrezik serioz jetën dhe sigurinë personale të zyrtarëve shtetërorë, qytetarëve të vendit dhe të personelit ndërkombëtar të Misionit të OSBE-së në Kosovë”.
Jelena Gjukanoviçit, e akuzuar për spiunazh u deklarua e pafajshme.
Avokati Predrag Milkoviç e ka ftuar gjykatën që ta shqyrtojë çështjen e paraburgimit, duke nënvizuar se caktimi i masës për arrest shtëpiak mund të merret si masë e mjaftueshme, pasi sipas tij, të gjitha provat materiale i janë siguruar prokurorisë.
Kjo kërkesë u kundërshtua nga prokurori, pasi sipas tij, ende ekzistojnë kushte që e bëjnë të domosdoshme masën e paraburgimit.
“Prandaj i propozoj gjykatës caktimin e masës së dorëzanisë dhe arrestit shtëpiak për Jelena Gjykanoviqin si masë, gjegjësisht si masa, të cilat janë të mjaftueshme që kjo procedurë të udhëhiqet pa pengesa. Duke e pas parasysh se ende ekzistojnë kushtet ligjore, konsiderojmë që për zhvillimin normal të procedurës penale masa e paraburgimit është masë e domosdoshme në këtë fazë të procedurës, në veçanti duke marrë parasysh për bazë rrezikun e ikjes të të pandehurës, përsëritjen e veprës penale, e cila sipas deklarimit të saj, ende duket të jetë pjesë e stafit të OSBE-së“, tha ai.
Trupi gjykues po ashtu kundërshtoi kërkesën e mbrojtjes për zgjatje të afatit për kundërshtimin e provave dhe kërkesën për hedhje të aktakuzës.
Leave a Reply