Bashkimi Evropian po shqyrton mënyrat për të përdorur asetet e ngrira ruse – për të mbështetur të ashtuquajturën “kredinë e rimëkëmbjes” për Ukrainën – për të forcuar financat dhe për të anashkaluar rrezikun e një vetoje nga Hungaria – miqësore me Moskën, thanë zyrtarët, sipas “Reuters”.
Ukraina do ta kthejë kredinë vetëm pasi të marrë kompensim nga Rusia për dëmet e shkaktuara gjatë luftës. Plani u propozua nga presidentja e Komisionit Evropian, Ursula von der Leyen, javën e kaluar – në një kohë kur presidenti amerikan, Donald Trump po frenon ndihmën ushtarake të drejtpërdrejtë – të financuar nga SHBA-ja – për Kievin.
Von der Leyen tha se kredia mund të organizohej në bazë të bilanceve të parave të gatshme – të lidhura me asetet e bankës qendrore ruse – të ngrira në Perëndim – pas pushtimit rus në Ukrainë – dhe se nuk do të përfshinte sekuestrimin e aseteve.
Zyrtarët thanë se mekanizmi i ri mund të krijohej nga “koalicioni i të gatshëmve”, në vend të të gjitha 27 qeverive të BE-së, nëse Budapesti nuk dëshironte të merrte pjesë.
“Ne patëm një diskutim paraprak mbi idenë e re të kredisë. Por deri më tani shumë çështje, përfshirë shumat, nuk janë të qarta”, tha një zyrtar i lartë i BE-së.
Rreth 210 miliardë euro asete ruse janë të palëvizshme në Evropë. Shumica prej tyre, tashmë janë maturuar dhe janë bërë para të gatshme – të mbajtura nga depozita belge e letrave me vlerë “Euroclear”.
BE-ja ka përdorur interesin nga asetet për të shlyer kredinë prej 50 miliardë dollarësh për Ukrainën të ofruar nga vendet e G7.
Leave a Reply