Shtetet e Bashkuara të Amerikës kanë zhvilluar bisedime me shtetet arabe të Gjirit rreth mundësive për të qeverisur Gazën pasi të mbarojë lufta, tha sot ambasadori amerikan, Mike Huckabee, sipas “Reuters”. Huckabee tha se ka pasur bisedime rreth një strukture të përkohshme qeverisëse që përfshin shtetet arabe të Gjirit.
Pas gati dy vitesh lufte, Izraeli nuk e ka përcaktuar qartë se si dëshiron që Gaza të qeveriset, megjithëse ekziston një konsensus i gjerë ndërkombëtar se grupi militant Hamas, i dobësuar nga rrethimi i Izraelit, nuk mund të mbetet në krye.
Huckabee nuk dha detaje se kur ishin zhvilluar bisedimet ose cilat shtete të Gjirit ishin përfshirë. Në janar, Emiratet e Bashkuara Arabe diskutuan me SHBA-në dhe Izraelin pjesëmarrjen në një administratë të përkohshme të Gazës pas luftës – që përfshinte Autoritetin Palestinez (AP).
Në maj, SHBA-ja diskutoi veçmas mundësinë e vetë drejtimit të një administrate të përkohshme pas luftës.
AP, e cila ushtron sundim të kufizuar civil në Bregun Perëndimor – të pushtuar nga Izraeli – u detyrua të largohej nga Gaza në vitin 2007, duke thënë se është gati të qeverisë Gazën me mbështetjen ndërkombëtare.
Por, kryeministri izraelit Benjamin Netanyahu kundërshtoi përfshirjen e AP-së dhe tha se nuk do të kishte kurrë një shtet palestinez.
Krijimi i një shteti të tillë është një nga kushtet që Emiratet e Bashkuara Arabe kanë vendosur për të marrë pjesë në një plan për Gazën, pas luftës.
Netanyahu ka deklaruar gjithashtu se Izraeli duhet të mbajë kontrollin e përgjithshëm të sigurisë – së bashku me një administratë civile të udhëhequr nga arabët.
Të tjerë në koalicionin e tij të krahut të djathtë, megjithatë, duan të aneksojnë Gazën.
Huckabee tha se SHBA-ja nuk do të bashkohej me asnjë plan me AP-në – nëse ajo vazhdon të bëjë pagesa për individët dhe familjet e përfshira – në atë që SHBA-ja e quan akte terrorizmi.
I pyetur se çfarë mesazhi kishte dhënë sekretari amerikan i Shtetit, Marco Rubio për operacionin në Qytetin e Gazës gjatë vizitës së tij në Izrael këtë javë, Huckabee tha se SHBA-ja e kuptoi se Izraeli “duhet të bëjë atë që duhet të bëjë” – për të rikthyer pengjet e tij dhe për t’i dhënë fund luftës.
Izraeli tha se rreth 20 pengje janë ende gjallë në Gaza – pasi u kapën në sulmin e Hamasit në tetor 2023 që shkaktoi luftën.
Besohet gjithashtu se militantët mbajnë trupat e 28 pengjeve të vdekur.
Qindra mijëra palestinezë janë larguar nga Qyteti i Gazës që kur Netanyahu urdhëroi ushtrinë më 8 gusht të merrte kontrollin, por një numër më i madh kanë qëndruar në vend, ose në shtëpi të shkatërruara midis rrënojave ose në kampe të improvizuara me tenda.
Leave a Reply