Trump dhe kursi i ri i luftës në Ukrainë

Nga Elton METAJ

Presidenti amerikan, Donald J. Trump, nga Nju-Jorku ku ndodhej për të marrë pjesë në mbledhjen e Asamblesë së Përgjithshme të Kombeve të Bashkuara, “firmosi” një nga deklaratat më të forta lidhur me luftën në Ukrainë. Herë kritik me Zelenskin dhe shumë i sjellshëm me Putinin, herë të tjera i ashpër me Presidentin rus dhe miqësor me homologun ukrainas, Presidenti Trump kishte provuar prej janarit 2025 pista nga më të ndryshme që do të çonin në mbylljen e agresionit rus ndaj Kievit. Ai kishte folur edhe për shkëmbim kufijsh dhe Paketë të Garancive të Sigurisë për Ukrainën, por duket se gjithçka ka marrë një rrugë tjetër.

Me një postim në rrjetin e tij social “Truth”, shefi i Shtëpisë së Bardhë tha shumë të vërteta dhe vuri pikat mbi “i” për shumë nga çështjet më të diskutuara të konfliktit të armatosur, duke e kthyer fokusin në një drejtim krejt tjetër: Ukraina mund të rimarrë territoret e pushtuara dhe të fitojë luftën.

Mbi të gjitha, #Trump nuk e ka parë fitoren e Ukrainës si një ëndërr apo dëshirë, por ka projektuar edhe rrugën si mund të arrihet deri në shuarjen e luftës. Presidenti amerikan deklaroi se e ka njohur dhe kuptuar plotësisht situatën ekonomike dhe ushtarake mes Rusisë dhe Ukrainës. Pa një përfshirje direkte të SHBA-së, Trump duket se i jep Ukrainës së Zelenskit “dritën jeshile” për një fazë të re veprimesh.

Korniza e strukturuar nga Trump është krejt e qartë:

Së pari, Shtetet e Bashkuara pranojnë se Ukraina mund ta fitojë luftën.

Së dyti, SHBA pranon se Ukraina mund të rifitojë të gjithë territoret e humbur.

Së treti, Uashingtoni lë të hapur mundësinë që Ukraina të shkojë edhe përtej kufijve të saj shtetërorë.

Së katërti, Bashkimi Europian dhe NATO do të jenë krah Ukrainës me financim e pajisje.

Së pesti, SHBA do t’i shesë armë NATO-s, që mund të dërgohen në Ukrainë.

Së gjashti, Rusia ndodhet nën shqetësime shumë të mëdha lidhur me gjendjen ekonomike.

Me këtë gjashtëkëndësh në dorë, Володимир Зеленський mund të kthehet i kënaqur në Kiev dhe të drejtojë ushtrinë e tij për të rimarrë çfarë ka humbur në këto 43 muaj. SHBA e kanë dhënë miratimin e tyre, BE duhet të hapë fondet dhe NATO të dërgojë pajisje e inteligjencë. Për këtë duhet kohë, durim dhe mbështetje.

“Tigri prej letre” që parashikonte të merrte Kievin brenda 48 orësh a një jave, tashmë ka mbi 3 vjet e gjysmë që ropatet të sigurojë copa fitoresh, kundrejt një vendi disa herë më të vogël. Një rropatje që nuk dihet se sa do të vazhdojë dhe që rrezikon të sjellë humbjen e gjithçkaje të marrë. Ndoshta edhe më tepër.