Tre kamionë me mesazhe kundër Kosovës dhe kryeministrit në detyrë Albin Kurti po qarkullojnë këto ditë në rrugët jashtë selisë së Kombeve të Bashkuara në Nju-Jork, aty ku po mbahen seancat e Asamblesë së Përgjithshme.
Sipas medias serbe “Blic”, ky është një organizim nga diaspora serbe në Shtetet e Bashkuara të Amerikës, pasi “duan të tërheqin vëmendjen për gjendjen e vështirë në të cilën jetojnë serbët në Kosovë”.
Në tre kamionë u panë foto të krimeve të pretenduara të UÇK-së dhe ankesa se si serbët në Kosovë janë nën presion të vazhdueshëm nga “autoritetet që udhëhiqen nga Kurti”.
Aleks Mitrovic foli në emër të diasporës serbe, duke thënë se duan të nxjerrin në pah situatë të kahershme dhe se “amerikanët nuk janë mjaftueshëm të njohur me gjendjen e vështirë të serbëve” në Kosovë.
“Presidenti i ShBA-së Donald Trump, në fjalimin e tij në Asamblenë e Përgjithshme të OKB-së deklaroi se çështja e Kosovës, ose më saktë lufta në Kosovë, është zgjidhur. Megjithatë, sot jemi para OKB-së si përfaqësues të serbëve, për të tërhequr vëmendjen ndaj situatës reale në Kosovë, e cila është ende duke vazhduar”, u shpreh Mitrovic.
Ai theksoi se kjo është hera e dytë që ata kanë organizuar një aksion të tillë, i cili sipas tij, duhet të rrisë ndërgjegjësimin e amerikanëve dhe ndërkombëtarëve në lidhje me gjithçka që po përjeton popullsia serbe në Kosovë.
Leave a Reply