Katari: Hamas, përkushtim ndaj studimit “me përgjegjësi” të planit “Trump”

Grupi palestinez “Hamas” premtoi se do ta “studiojë me përgjegjësi” planin e presidentit amerikan Donald Trump për Gazën, njoftoi të martën Katari.

“Hamas e mori mbrëmë vonë planin e Trumpit dhe premtoi ta studiojë me përgjegjësi,” tha zëdhënësi i Ministrisë së Jashtme Majed Al Ansari në një konferencë për media në Doha.

Ai tha se do të zhvillohen takime bilaterale me ekipin negociator të Hamasit dhe me pjesëmarrjen e delegacioneve turke dhe egjiptiane.

Të hënën, gjatë një konference për shtyp në Shtëpinë e Bardhë me kryeministrin izraelit Benjamin Netanyahu, Trump prezantoi një plan me 20 pika për t’i dhënë fund luftës izraelite në Gaza.

Plani bën thirrje për lirimin e të gjitha pengjeve izraelite në këmbim të dhjetëra të burgosurve palestinezë, çarmatosjen e plotë të Hamasit, tërheqjen graduale të forcave izraelite dhe krijimin e një komiteti palestinez teknokrat, apolitik, për të administruar enklavën.