Nga Elton METAJ
Ivana Marie Trump vizitoi Vlorën në fund të muajit qershor, në një udhëtim aspak surprizë për autoritetet e qytetit bregdetar dhe shumë të tjerë në Tiranë. E shoqëruar nga familja, vajza e Presidentit amerikan publikoi një foto pas largimit, ku ajo pozonte në sfond, me Sazanin, perëndimin e diellit dhe detin e mrekullueshëm. Së bashku me djalin, Theodore James, nipin e preferuar të njeriut më të fuqishëm të botës, Ivanka ndërtoi një kartolinë perfekte për Vlorën, që përfshihej në një album fotosh spektakolare nga udhëtimi i familjes Kushner-Trump në Venecia të Italisë për të bërë “qokën” e martesës së miliarderit Jef Bezos.
Pikërisht në këtë kornizë bukurie natyrore, por edhe sharmi e luksi njerëzor, vendosej Vlora, me një reklamë gjigande në rrjetet sociale, ku Ivanka Trump ka mbi 15 milionë ndjekës. Por sa e shfrytëzoi Qyteti i Pavarësisë dhe tashmë “lokomotiva e turizmit elitar” në Shqipëri, dhuratën e 44-vjeçares amerikano-çeke? A ishte kjo vizitë vetëm një inspektim biznesi, i lidhur me investimin e pritshëm në Sazan apo edhe një ndalesë turistike për të prekur bukuritë e bregdetit shqiptar?
Të vendosur prej javësh në kritika publike, sa për problemet me ujin e pijshëm e energjinë elektrike apo për “incenerimin” natyror të mbetjeve, autoritetet vendore kishin një mundësi të artë për të ndërtuar një mini-fushatë komunikimi publik e marketimi mbi vizitën e miqve VIP amerikanë në “shtëpinë” e tyre. Mbi të gjitha, për t’i thēnë botës mbarë se Trump-ët nuk vinin vetëm për seancën e radhës së negociatave të biznesit, por për të shijuar Vlorën e Shqipërinë, natyrën e ushqimin e mrekullueshëm, dy avantazhe të mëdha në trajektoren tonë turistike.
Sigurisht që udhëtimi i Ivanka Trump dhe familjes së saj ka qenë jozyrtar, i mbuluar nga masat e sigurisë dhe privatësia, por një mendje e zgjuar mund të “shtrydhte” nga ajo vizitë aq elementë sa do të mjaftonin për ta mbajtur gjallë në median vendase e jo vetëm, për ditë të tëra. Askush nuk “i ndihmoi” gazetarët të ndodheshin si rastêsisht pranë vilave qeveritare për të filmuar pak sekonda nga autokolona e mjeteve që kalonte tunelin e famshëm te “Uji i Ftohtë” apo të rrëfenin për të ftuarit e darkës së shtruar nën ritmin e dallgëve që pushonin qetësisht në shkëmbinjtë e bregut vlonjat.
Jo. Gjithçka u la në rënie të lirë dhe pas publikimit nga Ivanka të fotos në muzgun e ndezur vlonjat, të zgjedhurit vendorë u kujtuan për bukurinë e qytetit, duke shpenzuar më pak fjalë se për vizitën në Vlorë të ambasadores së Japonisë.
Ndër vite, Vlora ka vuajtur jo pak nga episode negative në turizëm, ashtu siç nuk kanë munguar fushatat e dirigjuara për të zmadhuar çdo problematikë apo më keq akoma, për të goditur me negativitet falco turistët që zgjidhnin Shqipërinë. Pikërisht për këtë, Ivanka nuk duhej lënë të na ikte aq lehtë. Vizita e saj mund të kthehej në simbolin e nisjes së një sezoni turistik pozitiv për Vlorën, për qytetarët e sipërmarrësit, por mbi të gjitha për mijëra e mijëra pushues, të cilët janë të vetmit “pushtues” që vlonjatët i mirëpresin.
