Makron i ngarkon sërish Lekornusë detyrën e krijimit të qeverisë

Presidenti francez, Emanuel Makron, i ka ngarkuar si detyrë kryeministrit në largim, Sebastien Lekornu të gjejë një rrugëdalje nga kriza politike, pas dorëheqjes së tij të papritur.

Sipas Pallatit Elize, ”Makron i kishte kërkuar Lecornusë, i cili vazhdon të shërbejë si kryeministër i përkohshëm, të zhvillonte negociata përfundimtare deri të mërkurën në mbrëmje, me qëllim krijimin e një kuadri për të siguruar stabilitetin”.

“Me kërkesë të presidentit, deklarova se jam gati të zhvilloj bisedime përfundimtare me forcat politike për të siguruar stabilitetin e vendit”, shkroi Lekornu në X.

Ai shtoi se ”do ta informonte Makronin të mërkurën në mbrëmje nëse kjo do të ishte e mundur, në mënyrë që ai të mund të nxjerrë të gjitha përfundimet e nevojshme”.

Gazeta ”Le Figaro” raportoi, duke cituar burime pranë presidentit, se Makron do të merrte përgjegjësinë nëse këto negociata përfundimtare dështojnë.