Agjencia ndërkombëtare e vlerësimit të kreditit Moody’s Ratings ka rikonfirmuar në raportin e saj periodik vlerësimin afatgjatë të kreditit sovran të Shqipërisë në nivelin “Ba3” me perspektivë të qëndrueshme, bëri të ditur Ministria e Financave. Ky rikonfirmim vjen si pasojë e vlerësimit pozitiv të qëndrueshmërisë makroekonomike të vendit, pavarësisht sfidave të mëdha si tërmeti i vitit 2019, pandemia globale dhe kriza energjetike në Evropë. Moody’s thekson aftësinë e ekonomisë shqiptare për rimëkëmbje të shpejtë dhe qëndrueshmëri strukturore, duke ruajtur stabilitetin në një mjedis sfidues ndërkombëtar.
Në raport, agjencia vlerëson se perspektiva afatmesme e rritjes ekonomike në Shqipëri mbetet pozitive, me një parashikim të rritjes reale të PBB-së prej 3.7% në vitin 2025 dhe 3.5% në vitin 2026. Kjo rritje do të nxitet nga konsumi i brendshëm, si dhe investimet e vazhdueshme në infrastrukturën e turizmit dhe energjisë.
Sektori i turizmit pritet të mbetet një ndër kontribuuesit kryesorë në rritjen ekonomike, përmes rritjes së eksporteve të shërbimeve dhe investimeve në ndërtim, thekson në raportin e saj Moody’s.
Moody’s vë në dukje se borxhi publik ka ndjekur një trajektore rënëse që nga viti 2022, pas tre krizave të njëpasnjëshme. Raporti i borxhit ndaj PBB-së ra në 54.2% në vitin 2024, nga një kulm prej 74.1% në 2021. Parashikimet për vitin 2026 e vendosin këtë raport në 53.5%, i mbështetur nga rritja ekonomike dhe një suficit primar fiskal.
Agjencia thekson gjithashtu angazhimin e autoriteteve për të respektuar rregullat fiskale të përcaktuara në Ligjin Organik të Buxhetit, që synojnë mbajtjen e një bilanci primar të paktën të balancuar dhe uljen graduale të borxhit publik në 45% të PBB-së.
Në aspektin e jashtëm, Moody’s vlerëson pozitivisht uljen e deficitit të llogarisë korrente, i cili qëndroi në 2.4% të PBB-së në vitin 2024 dhe pritet të mbetet në këtë nivel edhe në 2025–2026 – ndjeshëm më i ulët se mesatarja 7.3% e viteve 2017–2022. Investimet e huaja direkte ndihmojnë në zbutjen e rreziqeve të jashtme, ndërsa sektori financiar mbetet i kapitalizuar dhe likuid.
Raporti i Moody’s nënvizon se Shqipëria do të vazhdojë të përfitojë nga fondet e BE-së dhe zbatimi gradual i reformave të lidhura me procesin e anëtarësimit, veçanërisht në fushat e sundimit të ligjit, luftës kundër korrupsionit dhe mirëqeverisjes. Këto reforma pritet të përshpejtojnë bisedimet për anëtarësim dhe të mbështesin një rritje ekonomike të qëndrueshme, duke ngushtuar hendekun e të ardhurave me vendet e BE-së.
Leave a Reply