NATO do të nisë sot manovrat vjetore ushtarake të quajtura “Steadfast Noon”. Manovra nuk është një përgjigje ndaj shkeljeve të fundit të hapësirës ajrore ruse apo provokimeve të tjera, tha sot sekretari i përgjithshëm i aleancës, Mark Rutte.
Rutte theksoi se kjo stërvitje ishte pjesë e manovrave vjetore. “Këto manovra na ndihmojnë të sigurohemi që “parandalimi ynë bërthamor” të mbetet sa më i besueshëm dhe sa më i sigurt dhe sa më efektiv të jetë e mundur”, tha ai.
“Gjithashtu i dërgon një sinjal të qartë çdo kundërshtari të mundshëm se ne do t’i mbrojmë të gjithë aleatët nga të gjitha kërcënimet”, shtoi Rutte.
Baza kryesore për manovrat vjetore të këtij viti është baza ajrore holandeze në Volkel me planifikime të mëtejshme të aktiviteteve në Kleine-Brogel në Belgjikë, Lakenheath në Britaninë e Madhe dhe Skrydstrup në Danimarkë.
“Një total prej rreth 2 000 ushtarakësh nga 14 vende të NATO-s dhe më shumë se 70 avionë do të përfshihen në manovër”, sipas planifikuesit kryesor Daniel Bunch.
Forcat Ajrore Gjermane do të marrin pjesë me tre avionë “Tornado” të pajisur për të hedhur bomba bërthamore amerikane dhe katër avionë luftarakë “Eurofighter”. Sipas ekspertëve ushtarakë, manovrat që zhvillohen rregullisht në tetor – përfshijnë praktikimin e transportit të sigurt të armëve bërthamore amerikane – nga mjediset nëntokësore të magazinimit në avionë dhe montimin e tyre në avionë luftarakë.
Megjithatë, gjatë këtyre manovrave nuk përdoren koka bërthamore të vërteta.
Jo të gjithë aleatët e NATO-s posedojnë bomba bërthamore, por armët bërthamore B61 amerikane janë të vendosura në disa vende evropiane si një mjet parandalues.
Sipas raporteve të pakonfirmuara, armët bërthamore amerikane janë të ruajtura në Italinë veriore, Belgjikë, Holandë dhe Buchel në Gjermani.
Leave a Reply