PS-PD, konsensus për reformën zgjedhore dhe territoriale

Konferenca e Kryetarëve në Kuvend shqyrtoi kërkesën e një grupi deputetësh të Grupit Parlamentar të Partisë Socialiste “Për ngritjen e Komisionit të Posaçëm Parlamentar të Kuvendit të Shqipërisë për Realizimin e Reformës Zgjedhore” dhe kërkesën “Për ngritjen e Komisionit të Posaçëm Parlamentar të Kuvendit të Shqipërisë për Reformën Administrativo-Territoriale në Republikën e Shqipërisë”.

Konferenca e Kryetarëve arriti dakordësinë dhe miratoi dy kërkesat në fjalë.

Në diskutimet për projektvendimin për ngritjen e Komisionit për Reformën Zgjedhore, kreu i grupit parlamentar të PD tha se “jemi dakord për ngritjen e komisionit, pasi kjo çështje është një detyrim. Por unë kërkoj që ky komision të ngrihet pasi të kemi raportin përfundimtar të OSBE-ODIHR-it. Nuk mund të bëjmë ndryshime, kur jemi në pritje të rekomandimeve dhe sugjerimeve nga ai raport. Pra, propozoj që ngritja e këtij komisioni të bëhet menjëherë pas publikimit të raportit”. Duke folur Komisioni i Posaçëm i Reformës Administrative-Territoriale, Bardhi theksoi se
“po prishni traditën parlamentare dhe minoni konsensusin. Kjo reformë duhet të garantojë një mekanizëm konsensual”.

Gjatë punimeve në Konferencën e Kryetarëve, kreu i grupit parlamentar të Partisë Demokratike, Gazment Bardhi kundërshtoi ndërprerjen e seancës së shkuar dhe kalimin në votim nga Kryetari i Kuvendit, Niko Peleshi. Ndërsa kryetari i grupit parlamentar të PS, Taulant Balla u shpreh në Konferencën e Kryetarëve se fjala e Kryeministrit duhet respektuar.

Gjithashtu Partia Demokratike kërkoi heqjen nga programi i punës së Kuvendit të “Ligjit për Barazinë Ligjore”.