Kuvendi i Shqipërisë miratoi të enjten me 71 vota pro një sërë projektligjesh thelbësore, të cilat shënojnë hapa të rëndësishëm në rrugëtimin e vendit drejt Bashkimit Evropian, si dhe mbështesin zhvillimin kombëtar në fusha kyçe. Në këtë seancë plenare u miratuan gjithashtu edhe tre Akte Normative.
Marrëveshjet kyçe në kuadër të IPA III
Një pjesë e rëndësishme e projektligjeve të miratuara lidhet me programet operacionale shumëvjeçare në kuadër të Instrumentit të Asistencës së Paraanëtarësimit (IPA III), për periudhën 2024-2027. Këto përfshijnë:
- Projektligji “Për ratifikimin e marrëveshjes së financimit mes Shqipërisë dhe Komisionit Evropian për programin operacional shumëvjeçar për punësimin e të rinjve”: Ministri i Ekonomisë, Kulturës dhe Inovacionit, Blendi Gonxhja, theksoi se kjo iniciativë synon adresimin e sfidave të tregut të punës dhe krijimin e mundësive të reja për rininë shqiptare.
- Projektligji “Për ratifikimin e marrëveshjes së financimit ndërmjet Shqipërisë dhe Komisionit Evropian për programin operacional shumëvjeçar për ekonominë dhe shoqërinë digjitale”.
- Projektligji “Për ratifikimin e marrëveshjes së financimit ndërmjet Shqipërisë dhe Komisionit Evropian për programin operacional shumëvjeçar për energjinë”.
Këto programe operacionale, në total, përfshijnë një financim prej 44 milionë eurosh. Prej tyre, 30 milionë euro janë grant nga Komisioni Evropian dhe 14 milionë euro janë bashkëfinancim nga buxheti i shtetit shqiptar, duke pasur një raport bashkëpunimi prej 68% financim evropian dhe 32% kombëtar.
Angazhime ndërkombëtare dhe zhvillim ekonomik
Kuvendi miratoi gjithashtu disa marrëveshje me rëndësi gjeopolitike dhe ekonomike:
- Projektligji “Për ratifikimin e marrëveshjes sipas Konventës së Kombeve të Bashkuara për të drejtën e detit mbi ruajtjen dhe përdorimin e qëndrueshëm të diversitetit biologjik detar të zonave përtej juridiksionit kombëtar”.
- Projektligji “Për ratifikimin e marrëveshjes për bashkëpunimin mbi sigurinë dhe mbështetjen afatgjatë ndërmjet Republikës së Shqipërisë dhe Ukrainës”. Ky projektligj, i nënshkruar më 21 janar 2025 në Davos, rikonfirmon solidaritetin e Shqipërisë me Ukrainën.
- Projektligji “Për aderimin e Republikës së Shqipërisë në Konventën për Themelimin e Zyrës Evropiane të Komunikacioneve (ECO) Hagë, më 23 qershor 1993, të ndryshuar në Kopenhagë, më 9 prill 2002”.
- Projektligji “Për ratifikimin e marrëveshjes së huas ndërmjet Këshillit të Ministrave të Republikës së Shqipërisë dhe Fondit për Zhvillim të Abu Dhabi-t” për financimin e “Mbështetjes për buxhetin e përgjithshëm mbi përpjekjet për zhvillim”. Kjo hua, me normë interesi 4% dhe afat maturimi 15 vjet, shoqërohet me një grant prej 20 milionë dollarësh, duke ulur normën efektive të interesit me 5.1%. Projekti synon gjithashtu përshpejtimin e integrimit europian dhe përmirësimin e klimës së biznesit.
- Projektligji “Për ratifikimin e marrëveshjes ndërmjet Bashkimit Evropian dhe Republikës së Shqipërisë për pjesëmarrjen e Republikës së Shqipërisë në programin e Bashkimit “Doganat””.
- Projektligji “Për ratifikimin e marrëveshjes së garancisë ndërmjet Republikës së Shqipërisë dhe Bankës Evropiane për Rindërtim dhe Zhvillim (BERZH)” për projektin e qëndrueshmërisë së Operatorit të Shpërndarjes së Energjisë Elektrike Group, sh.a., (OSHEE).
Miratimi i kësaj pakete të gjerë ligjore në Kuvend reflekton angazhimin e Shqipërisë për reformat e nevojshme në procesin e integrimit evropian, si dhe për forcimin e kapaciteteve ekonomike dhe institucionale të vendit.
Miratimi i Akteve Normative
Në të njëjtën seancë, Kuvendi miratoi me 71 vota pro edhe tre Akte Normative:
- Akti normativ “Për disa ndryshime dhe shtesa në ligjin nr. 115/2024 “Për buxhetin e vitit 2025””.
- Akti normativ “Për një shtesë në ligjin “Për pajisjen e shtetasve shqiptarë me pasaportë për jashtë shtetit”, i ndryshuar”.
- Akti normativ “Për një shtesë në ligjin “Për letërnjoftimin elektronik të shtetasve shqiptarë, i ndryshuar”.
Leave a Reply