Gjermania dërgon monitorues për procesin e paqes në Gaza

Forcat e armatosura gjermane, Bundeswehri, do të dërgojnë tre ushtarë në jug të Izraelit për të monitoruar procesin e paqes në konfliktin e Gazës .

Ministria e Mbrojtjes njoftoi se javën e ardhshme do të dërgohen dy oficerë stafi dhe, në fazën fillestare, një gjeneral brigade.

Ushtarët do të jenë në uniformë, por pa armë, në qendrën amerikane të koordinimit civil-ushtarak (CMCC), tha ministria.

Njoftimer thanë se rreth 200 ushtarë pritet të jenë pjesë e kësaj qendre.

Qendra e kontrollit është një nga njësitë ushtarake nën udhëheqjen e SHBA-ve, e cila po krijohet në jug të Izraelit, afër Rripit të Gazës, sipas medieve amerikane.

Ministria e Mbrojtjes deklaroi se detyrat e qendrës përfshijnë monitorimin e armëpushimit mes Izraelit dhe organizatës militante palestineze Hamas, pastrimin e rrënojave të luftës dhe koordinimin e ndihmave humanitare.

Për më tepër, ministria tha se qendra do të koordinojë integrimin, trajnimet dhe mbështetjen logjistike të Forcës Ndërkombëtare të Stabilizimit (ISF) të planifikuar për Rripin e Gazës.