Ukraina po përgatit një kontratë për të blerë 25 sisteme të mbrojtjes ajrore “Patriot”, deklaroi presidenti Volodimir Zelenski, duke theksuar se një marrëveshje e tillë do të përforconte ndjeshëm aftësitë e vendit për t’u mbrojtur nga bombardimet ajrore ruse, sipas “Reuters”.
Zelenski tha se sistemi do të furnizohet për disa vite me radhë, ndërsa Kievi do të kërkojë nga disa shtete evropiane që t’i japin Ukrainës përparësi në listën e pritjes për këto sisteme.
Për Ukrainën, sistemi “Patriot” konsiderohet mbrojtja më e efektshme kundër raketave balistike ruse, të cilat udhëtojnë me shpejtësi shumëfish të zërit.
Presidenti ukrainas u shpreh gjithashtu i gatshëm të shkojë në Budapest, ku pritet të takohen Vladimir Putin dhe Donald Trump, nëse do të propozohej një format takimi trepalësh ose një formë “diplomacie me shuttle”.
Leave a Reply