Nga Elton METAJ
“New York Cafe” në Budapest konsiderohet ndoshta ndër vendet më të bukura në botë për të gjerbur një kafe apo të famshmen kafe me qumësht me flori 24-karatësh. E nëse ke më shumë kohë dhe sigurisht më shumë para, një drekë apo një darkë në ndërtesën historike 130-vjeçare, risjell shijet e monarkisë austro-hungareze, nga gulashi te shniceli.
Pikërisht “New York Cafe” mund të ishte ndër vendet ideale, ku Trump dhe Putin mund të festonin simbolikisht arritjen e një marrëveshjeje paqeje për Ukrainën, nëse do të takoheshin brenda muajit tetor, siç parashikohej. Trump do të gjente në ndërtesë sharmin dhe luksin që po tenton ta përfshijë edhe në Shtëpinë e Bardhë me Dhomën e re të Ballos, ndërsa Putinit do t’i mjaftonte ndoshta vetëm aroma monarkike, shumë e ndryshme nga duhma e Carit që mund të ketë mbetur ende në Kremlin. Megjithatë takimi duket se nuk do të ndodhë, të paktën së afërmi, dhe “New York Cafe” mund të ketë humbur dy klientë të rëndësishëm. Sigurisht të pasur.
Presidenti amerikan #Trump, i cili habiti jo pak me nxitimin për të fiksuar një takim me Putinin vetëm 24 orë përpara se të ripriste Zelenskin, ishte dje shumë i qartë se nuk dëshironte të humbiste kohë. Ai e konsideroi të pavlerë udhëtimin drejt Budapestit, nëse nuk ka asnjë shans që lufta në Ukrainë të përfundojë. Një bisedë mes shefave të diplomacisë të Uashingtonit dhe Moskës, që në fakt duhet të shtronte rrugën drejt Budapestit për të dy liderët e rëndësishëm, pati një përfundim pa ekuivoke. Sot Trump dhe Putin mund të takohen për të pirë kafe, por jo për të bërë marrëveshje.
Këtë herë i frikësuar nga raketat “Tomahawk”, ashtu si në gusht nga sanksionet kur pranoi të udhëtonte në Alaska, #Putin ia ka dalë të veshë mantelin e paqes në telefonatat e zgjatura me Trumpin dhe me uljen e receptorit, ka rimarrë nga dollapi uniformën e gjeneralit gjakatar që lëshon çdo natë mbi 500 raketa e dronë drejt Ukrainës së cfilitur nga një luftë e gjatë. Por këtë herë, Presidenti amerikan zgjodhi të mos e ndezë “Air Force One” për të fluturuar drejt Europës. Ai duket se nuk do ta ndërmarrë këtë udhëtim për t’i ofruar Putinit një shtrëngim duart, disa buzëqeshje dhe një konferencë shtypi. Për Presidentin rus, të gjitha këto janë më shumë kohë për të vazhduar agresionin. Pa lëshime, pa marrëveshje nuk do të ketë foto dhe as kafe.
Në gusht 2025, rusët e refuzuan drekën amerikane në bazën ushtarake në Ankorazhë të Alaskës, me shpresën se strategjitë e strucit do të vazhdonin t’u jepnin javë e muaj të tjerë, jo vetëm për të luftuar me Ukrainën, por tashmë për të kërcënuar edhe Europën me një luftë hibride në zhvillim e sipër.
Në konjukturën e re, Trump rishpjegoi dje se kjo nuk ishte një luftë e Amerikës, ushtarët amerikanë nuk do të shkonin kurrë në terren dhe Uashingtoni nuk shpenzonte më para, por vetëm i shiste armatim NATO-s për t’ia kaluar Zelenskit me financimin europian. Sekretari i Përgjithshëm i NATO-s, Mark Rute, fluturoi me nxitim drejt Shtëpisë së Bardhë dhe takimi i pritshëm me Trumpin do të zbardhë shumë nga pikat e errëta, si të vizitës së pasuksesshme të Zelenskit një javë më parë, ashtu edhe të telefonatës po aq pa rezultat mes Marko Rubios e Sergei Lavrovit 24 orë më parë.
Mbi të gjitha, takimi SHBA-NATO do të duhet t’i japë përfundimisht zgjidhje një dileme të gjatë dhe të lodhshme, përfshirjes së Europës. Vendet europiane, të agresuara tashmë hapur nga Moska me dronë e sabotazh pa fund, duhet të kuptojnë një orë e më parë se Ukraina është lufta e tyre dhe në këtë luftë duhet të luftojnë ata. Dhe mbi të gjitha duhet të luftojnë në terren, po aq sa pas tastierës së kompjuterit. Në të kundërt, pas disa vitesh, “New York Cafe” në kryeqytetin hungarez rrezikon të kthehet sërish në një markatë mallrash të stilit sovjetik, ashtu si pas Luftës së Dytë Botërore.
Leave a Reply