Presidenti amerikan, Donald Trump, tha se do të vendosë nëse do ta kërkojë lirimin e liderit të burgosur palestinez Maruan Barguti, një figurë që shumë e shohin si të aftë për të bashkuar palestinezët rreth zgjidhjes me dy shtete. “Jam përballur me këtë pyetje rreth 15 minuta para se të më telefononit… Ishte pyetja ime e ditës”, tha Trump për revistën Time në një intervistë të publikuar të enjten.
“Kështu që, do të marr një vendim”, shtoi ai.
Komentet erdhën ndërsa Trump foli për udhëheqjen palestineze, duke thënë se “palestinezët nuk kanë një lider për momentin, të paktën jo një të dukshëm.”
I pyetur për rolin e mundshëm të presidentit të Autoritetit Palestinez, Mahmoud Abbas, në qeverisjen e Gazës pas luftës, Trump tha: “Gjithmonë jam marrë vesh mirë me të. Gjithmonë më është dukur i arsyeshëm, por ndoshta nuk është”.
Barguti është një nga figurat kryesore të Fatahut, shpesh i quajtur “Mandela palestinez” për ndikimin dhe aftësitë e tij udhëheqëse. Ai u arrestua nga Izraeli në vitin 2002 dhe u dënua me pesë dënime të përjetshme plus 40 vjet të tjera, nën akuzën se kishte drejtuar sulme vdekjeprurëse kundër izraelitëve.
Barguti renditet në krye të shumicës së sondazheve mes palestinezëve për kandidatin që do të votonin nëse do të mbaheshin zgjedhje presidenciale, duke e bërë atë një figurë potencialisht bashkuese për një zgjidhje me dy shtete.
Leave a Reply