Nga vijat e frontit të Luftës së Ftohtë deri te llogoret në Ukrainë, fotografitë arkivore tregojnë historinë e Radios Evropa e Lirë, e cila filloi transmetimet në Ditën e Pavarësisë së Shteteve të Bashkuara të Amerikës para 75 vjetëve. REL-i u themelua me synimin e deklaruar për të “mbajtur gjallë frymën e lirisë në zemrat dhe mendjet e njerëzve të robëruar” që jetonin nën komunizëm në Evropën Lindore.
Derisa REL-i kishte në shënjestër shtetet komuniste të Evropës, Radio Liria (RL), një organizatë motër, u themelua në vitin 1953 për të transmetuar në Bashkimin Sovjetik.
Një pjesë e financimit të REL-it vinte nga donacionet, por pjesa më e madhe e operacioneve financohej fshehurazi nga Agjencia Qendrore amerikane e Inteligjencës (CIA). Kjo fshehtësi ia mundësonte REL-it të ishte “i drejtpërdrejtë dhe goditës”, pa u penguar nga konsideratat e sikletshme diplomatike që përballen zakonisht transmetuesit e financuar haptazi nga shteti.
