Agjentët amerikanë joshën pilotin e Maduros

Agjentët federalë amerikanë kanë tentuar të joshin pilotin e avionit të Nikolas Maduros, për të mundësuar arrestimin e Presidentit të Venezuelës. Sipas planit të agjentëve, piloti duhej ta ulte avionin në një vend ku autoritetet amerikane të mund ta prangosnin njeriun e fortë të Venezuelës, për kapjen e të cilit SHBA ka ofruar 50 milionë dollarë.

Në këmbim të dorëzimit të Maduros, agjentët amerikanë mësohet se i kanë thënë pilotit të avionit se do të bëhej shumë i pasur.

Për pilotin e Maduros, i cili kishte udhëtuar më parë edhe me Presidentin Hugo Çavez, agjentët amerikanë ofruan tre mundësi uljeje të avionit: Porto-Riko, Republika Domenikane ose Baza e Guantanamos në ishullin e Kubës.

Pikërisht në Republikën Domenikane, agjentët kishin patur mundësi të kontaktonin fillimisht me pilotin Bitner Villegas, teksa avionët e Maduros “Dassault Falcon 2000EX” dhe “Dassault Falcon 900EX”, ndodheshin për riparim.