Shtetet e Bashkuara po zvogëlojnë numrin e trupave të vendosura në Rumani, por theksojnë se ky hap nuk nënkupton tërheqje nga Evropa apo dobësim të angazhimit ndaj NATO-s. Ministri rumun i Mbrojtjes, Ionut Mosteanu, njoftoi se reduktimi I numrit e trupave do të prekë vetëm bazën ajrore Mihail Kogălniceanu në brigjet e Detit të Zi.
Kjo bazë pritet të zgjerohet dhe të shndërrohet në një “qytet ushtarak”, sipas modelit të bazës gjermane në “Ramstein”.
Sipas tij, partneriteti me SHBA-në mbetet “i qëndrueshëm dhe i besueshëm”, ndërsa në dy bazat e tjera amerikane në Rumani numri i trupave do të mbetet i njëjtë.
Edhe pse Mosteanu nuk dha shifra të sakta, pritet që ulja të përfshijë disa qindra ushtarë. Rreth 1 000 trupa amerikane do të qëndrojnë në Rumani, një numër që, sipas tij, është “pak më i lartë” se ai i periudhës para pushtimit rus të Ukrainës në vitin 2022.
Në fillim të këtij viti, në vend ishin dislokuar rreth 1 700 ushtarë amerikanë, përfshirë 1 400 në bazën Kogălniceanu, që ka rëndësi strategjike për mbrojtjen e krahut lindor të NATO-s. Zona ka qenë disa herë nën kërcënimin e dronëve rusë, mbetjet e të cilëve kanë rënë edhe në territorin rumun.
Leave a Reply