Presidenti turk, Rexhep Taip Erdogan dhe kancelari gjerman, Friedrich Merz patën një përplasje për luftën në Gaza gjatë një konference të përbashkët për shtyp sot (e enjte) në Ankara. Ndërsa Merz rikonfirmoi mbështetjen e fortë të Gjermanisë për Izraelin, Erdogan akuzoi sërish vendin për kryerjen e një “gjenocidi”.
Udhëheqësi turk vuri në dukje se Izraeli kishte nisur sulme të mëdha ajrore në Gaza këtë javë, pavarësisht armëpushimit që hyri në fuqi më 10 tetor. Izraeli tha dje se kishte “rinovuar” zbatimin e armëpushimit.
“Ata jo vetëm që po sulmojnë Gazën, por gjithmonë kanë qenë të vendosur ta nënshtrojnë Gazën përmes urisë dhe gjenocidit, dhe kjo është ende duke vazhduar”, tha Erdogan.
Deklarata e Erdogan erdhi në përgjigje të kancelarit gjerman, Merz, i cili i tha një gazetari turk se Izraeli ishte bërë një strehë për miliona hebrenj, duke përfshirë shumë prej tyre që i mbijetuan Holokaustit. “Kjo është arsyeja pse Gjermania do të qëndrojë gjithmonë në krah të Shtetit të Izraelit”, tha Merz.
Kancelari gjerman shtoi se Izraeli kishte ushtruar “të drejtën e tij për vetëmbrojtje” pas sulmit të udhëhequr nga Hamasi më 7 tetor 2023 – duke thënë se lufta shkatërruese mund të ishte shmangur nëse Hamasi do të kishte liruar pengjet më herët dhe do të kishte dorëzuar armët.
Leave a Reply