Nga Afrim KRASNIQI
Tirana pati mbivendosje lajmesh këto ditë, SPAK dhe përcjellje partie, – por personalisht mendoj se seanca në Gjykatën Kushtetuese e datës 31 tetor meriton vëmendje dhe vlerësim. Nuk ka rëndësi subjekti dhe as impakti politik, por ajo çfarë e bëri atë të vlefshme është ofrimi i një modeli të funksionimit institucional, i një debati ligjor dhe kushtetues midis profesionistëve të secilës palë, – gjyqtarët kushtetues me komente dhe pyetje profesionale, avokatët me argumente profesionale, palët në proces nga kryeministria dhe zyra e presidentit gjithashtu me argumente profesionale. Mund të mos jesh dakord me ndofta gjysmën e tyre, por nuk mund të mos respektosh qasjen e prezantimit të tyre.
Një lloj ushtrimi demokratik mbi Kushtetutën, konceptet e ndarjes e balancës së pushteteve, vlerën e ligjit dhe integritetin e zyrtarëve, mbi parimet kushtetuese dhe praktikat ndërkombëtare. Disa orë leksion (jo show) dhe edukatë ligjore që ngjante me një vend të maturuar dhe një realitet tej retorikës populiste, denigruese dhe qasjes konsumatore ditore që ofron politika, e shpesh edhe media.
Natyrisht, thelbi/produkti i këtij debati do të lexohet në vendimin final dhe standardi që krijohet përmes vendimmarrjes, por deri atëherë ia vlen të thuhet, se debati na zhgënjeu pozitivisht, dhe ofroi një model institucional etike dhe profesionalizmi që rrallë e gjen në institucionet tona aq më tepër në ato të diskursit publik, përfshirë parlamenti, qeveria, partitë politike, KLGJ, KLP apo disa prej institucioneve të tjera të pavarura.
Në këtë aspekt seanca ishte dhe mbetet një zhvillim pozitiv, një investim për kulturë dhe edukim ligjor e demokratik, pa të cilën nuk mund të ketë sukses as reforma në drejtësi, apo për më tepër, as procesi i jetësimit të demokracisë funksionale dhe i shtetit të së drejtës që vijon të premtohet prej disa dekadash.
(Marrë nga profili i autorit në “Facebook”. Titulli është i redaksisë)
Leave a Reply