Partia ANO e miliarderit Andrei Babis, fitues i zgjedhjeve parlamentare çeke në tetor, nënshkroi sot një marrëveshje koalicioni me partitë e ekstremit të djathtë SPD dhe të krahut të djathtë “Zëri i motoristëve’’, por duke pohuar angazhimin e tyre ndaj BE-së. “Republika Çeke është një anëtare sovrane e Bashkimit Evropian dhe një aleate e fortë e NATO-s”, shkruan ata në marrëveshjen e nënshkruar në ditën e parë të seancës së parlamentit të ri çek.
”Por ne duam një Evropë të ndryshme që do t’u lejonte shteteve anëtare të ruanin lirinë e tyre për çështjet që janë ekskluzivisht të tyre”, shtuan ata.
Lidhur me Ukrainën, tre partnerët, të cilët dëshirojnë të zvogëlojnë ndihmën financiare për vendin në luftë me Rusinë, deklaruan qëllimin e tyre për të mbështetur “përpjekjet diplomatike që synojnë t’i japin fund luftës në Ukrainë”.
Nënshkrimi i marrëveshjes së koalicionit vjen një muaj pas zgjedhjeve parlamentare të fituara nga partia ANO, megjithëse me një numër të pamjaftueshëm vendesh – 80 nga 200 – për të qeverisur e vetme.
Babis, i ngarkuar javën e kaluar nga presidenti Petr Pavel me formimin e qeverisë së re, specifikoi se shpërndarja e posteve qeveritare nuk do të diskutohej para fundit të muajit.
Gjatë fushatës zgjedhore, SPD bëri thirrje për një referendum mbi anëtarësimin në BE, një propozim që Babis e përjashtoi.
Megjithatë, të tre partitë e koalicionit premtuan se Republika Çeke “nuk do ta miratonte euron dhe as nuk do të ndërmerrte ndonjë hap për ta miratuar atë”, diçka që ishte zotuar ta bënte kur iu bashkua BE-së në vitin 2004.
Leave a Reply