Një pjesë e kullës mesjetare në Romën qendrore u shemb dje, duke shkaktuar vdekjen e një personi. Incidenti ndodhi në “Torre dei Conti”, kullën historike të shekullit XIII, e cila është duke u restauruar.
Kulla ndodhet pranë Forumeve Perandorake dhe Koloseut, të cilat janë atraksione të njohura turistike. Një punonjës ndërtimi u nxor i gjallë nga rrënojat pas më shumë se 10 orësh pas shembjes së pjesshme. “Ai më pas pësoi arrest kardiak dhe nuk mundi të shpëtonte kur arriti në spital”, raportoi media italiane, përfshirë agjencinë e lajmeve ANSA.
“Tre punonjës të tjerë u bllokuan fillimisht në nivelin e sipërm të strukturës, por u shpëtuan dhe patën vetëm plagë të lehta”, raportoi ANSA.
“Punonjësi i ndërtimit që ishte bllokuar nën rrënoja për orë të tëra pas shembjes së “Torre dei Conti” nuk ia doli, pavarësisht përpjekjeve të jashtëzakonshme të ndihmësve të parë,” tha guvernatorin e Lacios, Francesco Rocca. Dëshmitarët okularë raportuan se kishin dëgjuar një zhurmë të fortë – të ndjekur nga një re masive pluhuri në rrugët e ngushta përreth zonës.
Menjëherë pas shembjes së pjesshme, zjarrfikësit dhe policia rrethuan të gjithë zonën për të lejuar shërbimet e emergjencës të kryenin punën e tyre.
“Ndërsa zjarrfikësit ishin ende duke punuar, një pjesë tjetër e kullës u shemb. Zjarrfikësit në një shkallë rrotulluese arritën të zbrisnin në kohë dhe të ishin siguri”, sipas raportimeve.
“Torre dei Conti” u ndërtua në shekullin XIII gjatë papatit të Papa Inocent III. Kulla, e cila tani është 29 metra e lartë, dikur ishte rreth 50 deri në 60 metra e lartë.
Megjithatë, katet e sipërme u dëmtuan nga një seri tërmetesh në shekujt XIV dhe XVII dhe më vonë u shembën. Ndërtesa ka qenë e pabanueshme dhe e braktisur prej disa kohësh.
Leave a Reply