Presidenti i SHBA-së, Donald Trump ka kërcënuar BBC-në me një padi prej një miliard dollarësh për montazhin e një dokumentari. Kreu i BBC-së, Samir Shah, ka kërkuar falje për një “gabim gjykimi” për montazhin e një fjalimi të Trump përpara sulmit në Kapitol të SHBA-së më 6 janar 2021.
Kërkimi i faljes vjen pas dorëheqjes së dy prej figurave më të larta të televizionit – drejtoresha ekzekutive e BBC News, Deborah Turness, dhe drejtori i përgjithshëm Tim Davie – të cilët njoftuan largimin e tyre nga BBC-ja pasi u ngritën shqetësime se fjalimi i presidentit Trump ishte montuar në mënyrë selektive.
Memorandumi i Michael Prescott ngriti shqetësime në lidhje me mënyrën se si videot e fjalimit të Trump u ndërthurën së bashku për ta bërë të dukej sikur nxiste në mënyrë të qartë trazirat në Capitol Hill në janar të vitit 2021.
“Letra, e avokatit të Trump, Alejandro Brito, kërkon që deklaratat e rreme, shpifëse, përçmuese dhe nxitëse të bëra ndaj Trump të tërhiqen menjëherë”, raportoi “Fox News”.
“Ne do ta shqyrtojmë letrën dhe do t’i përgjigjemi drejtpërdrejt në kohën e duhur”, tha një zëdhënës i BBC.
Letra i jep televizionit një afat deri të premten për t’u përgjigjur, duke shtuar se në të kundërt, Trump do të mbetet pa alternativë tjetër veçse të zbatojë të drejtat e tij ligjore dhe të barabarta, të cilat të gjitha janë të rezervuara shprehimisht, duke përfshirë ngritjen e padisë ligjore për jo më pak se 1,000,000,000 dollarë dëmshpërblim.
Leave a Reply