Ish-diplomati amerikan Kristofer Hill vazhdoi dëshminë në ditën e dytë të dëshmisë në Gjykatën Speciale. Lidhur me Hashim Thaçin, ish-diplomati amerikan Kristofer Hill, tha se në ndonjë pikë të caktuar ai përshkruhej si anëtar i Drejtorisë Politike të UÇK-së. “Nuk jam në gjendje t’ju them se kur është thënë kjo gjë, por ka qenë figurë përpara Rambujesë, më shumë hollësi nuk ju jap dot”, u përgjigj Hill.
Ai shtoi se nuk dinte nëse Hashim Thaçi ka qenë një prej themeluesve të UÇK-së. “Nuk e di nëse ai ka qenë një prej personave themelues të UÇK-së dhe fakti që unë nuk e kam hasur emrin e tij deri më vonë gjatë vitit, më sugjerojnë që ai nuk ka qenë, megjithatë nuk jam në pozitë për ta konfirmuar ose jo një gjë të tillë”, tha ai.
Ish-diplomati amerikan Hill tha në Gjykatën Speciale se nuk i kujtohej deklarata e Hashim Thaçit, sipas të cilës askush nuk do të guxonte të nënshkruante dokumente kundër vullnetit të popullit nga referendumi i vitit 1991, dhe se Thaçi nuk do të mbështeste marrëveshje pa referencë për pavarësinë e Kosovës. Hill shtoi se kjo nuk e habitte.
Ish-diplomati Hill më tutje, tha se me Hashim Thaçin është takuar pas fushatës së bombardimeve nga NATO, bashkë me James Rubin, derisa sqaroi se ai kishte pasur dy takime në Kosovë para largimit, më parë me ish-presidentin Ibrahim Rugova dhe me Hashim Thaçin. Hill më tej foli për gjendjen kur forcat e NATO-s hynë në Kosovë, përkatësisht për gjendjen pas miratimit të rezolutës 1244 nga KS e OKB-së.
“Mendoj se çështjet që ndodhën menjëherë në atë periudhë kohore kishin të bënin me çarmatosjen, zhbërjen e UÇK-së, se si kjo do të mund të realizohej , sepse shumë njerëz nuk donin të dorëzonin armët e tyre dhe kjo çështje filloi të krijojë nocionin e Trupave të Mbrojtjes së Kosovës, diçka që do të kujdesej për fatkeqësitë natyrore. Unë isha në ditët e fundit dhe pas kësaj do të largohesha, pasi ishte një ambasador James Rubin, i cili do të merrej me çështjet e rindërtimit të pasluftës dhe formimin e qeverisë”, tha Hill.
Leave a Reply