Kryeministri suedez paralajmëron “situatë serioze të sigurisë”

Kryeministri suedez, Ulf Kristersson, ka paralajmëruar se Suedia mund të përballet me një “situatë serioze të sigurisë” teksa vendi shkon drejt zgjedhjeve në vitin 2026.

“Demokracia suedeze është në thelb e përgatitur mirë përpara zgjedhjeve të përgjithshme në vitin 2026. Por kur Suedia të shkojë në zgjedhje vitin e ardhshëm, ne do ta bëjmë këtë në një situatë serioze të sigurisë që duhet ta marrim parasysh”, shkroi Kristersson në platformën sociale të kompanisë amerikane X.

Kristersson tha se vitin e ardhshëm do të mbledhë të tetë krerët e partive për diskutime mbi përpjekjet e vazhdueshme për t’iu kundërvënë “kërcënimeve nga ndërhyrjet e huaja”.

Suedia do të mbajë zgjedhje të përgjithshme më 13 shtator të vitit të ardhshëm dhe sipas Ministrisë së Mbrojtjes, sulmet kibernetike ndaj vendit janë në rritje.

Duke u bazuar në këtë, qeveria ka urdhëruar agjencinë kibernetike të vlerësojë kërcënimet dhe të propozojë mbrojtje.