Nga Elton METAJ
Zhvillimet e forta politike, veprimet e SPAK-ut dhe përplasjet mes institucioneve e individëve me peshë, edhe ekonomike ndër të tjera, i bëjnë medias dy shërbime njëkohësisht: Një të keq dhe një të mirë.
Pjesa e keqe lidhet me faktin se, mes shumë reporterëve, opinionistëve dhe analistëve, në portale e televizione, me mendimet e të cilëve mund mos të biesh dakord gjithë ditën e natën, por ama janë mendimet e tyre, ngatërrohen gazetarë e investigues “të ngacmuar” nga jashtë, të shoqëruar deri në hyrjet e studiove televizive apo tastierat e kompjuterëve nga personat direkt të interesuar për shkrimin e “bombën” që do të plasin, si burim i sigurtë apo “gërrmim” profesional i pavarur. Mes këtyre “investigimeve” gjen befas detaje personale, familjare e profesionale, që e telendisin kundërshtarin a rivalin e “pagatorit” pa asnjë skrupull profesional.
Pjesa e mirë lidhet me faktin se gjatë situatave me tension të lartë, me nerva të acaruara dhe me “gaz” në maksimum, mund të kuptosh urdhëruesit e porositësit e këtyre sulmeve të paketuara me stofin e bukur të “investigimit” a “analizës”, që vetëm me gazetarinë nuk kanë lidhje. Pra thënë troç, në ditë e orë si këto mund të kuptosh “kush paguan kë” dhe, për më tepër edhe “kush ka paguar kë”. Mund të zbërthesh lidhje personash e interesash, të reja a të konsoliduara, që i ngjajnë një ekipi snajperësh, të gatshëm ta shkrepin këmbëzën, si nga qindra metra distancë, ashtu edhe nga afër fare.
Për ditë vjeshte me shi si këto, Kadare shkruante:
Edhe m’u duk pak e çuditshme
Si erdh kjo vjeshtë, ky mëngjes.
Qiejt e ngrysur pa lejlekë
Dhe shirat pa ylberë në mes.
Leave a Reply