Presidenti ukrainas, Volodimir Zelenski, u bëri thirrje aleatëve të Ukrainës të ndihmojnë në përmirësimin e mbrojtjes ajrore të vendit përballë sulmeve të vazhdueshme ruse, ndërsa në Gjenevë kanë nisur bisedimet per planin e paqes të paraqitur nga presidenti i SHBA-së, Donald Trump.
“Paralelisht me rrugën diplomatike, ne duhet të bëjmë gjithçka që mundemi për të përforcuar mbrojtjen tonë kundër këtyre sulmeve të egra ruse”, tha Zelenski në Telegram duke vënë në dukje fillimin e bisedimeve që përfshijnë SHBA-në, Gjermaninë, Britaninë e Madhe dhe Francën
“Është shumë e rëndësishme të përshpejtojmë të gjitha marrëveshjet tona me partnerët tanë mbi sistemet dhe raketat e mbrojtjes ajrore”, shtoi ai.
Në Gjenevë kanë nisur sot bisedimet për planin 28-pikësh të Trump për t’i dhënë fund luftës që filloi me pushtimin rus në shkurt 2022.
Plani i bën thirrje Ukrainës të bëjë lëshime territoriale, ndërsa Zelenski tha se vendi i tij po përballej me një nga momentet më të vështira në historinë e tij.
“Rusia ka lëshuar më shumë se 1,050 dronë, rreth 1,000 bomba rrëshqitëse dhe më shumë se 60 raketa në Ukrainë gjatë javës së kaluar”, tha Zelenski në Telegram.
Në një video , ai kujtoi se 33 persona ishin vrarë të mërkurën dhe 100 të tjerë ishin plagosur – pas një sulmi rus me raketa ndaj një blloku apartamentesh në Ternopil në Ukrainën perëndimore. Mes të vdekurve ishin gjashtë fëmijë.
Leave a Reply