Ministri i Jashtëm turk, Hakan Fidan, do të vizitojë Iranin të dielën për një sërë takimesh të nivelit të lartë që synojnë forcimin e marrëdhënieve dypalëshe dhe trajtimin e çështjeve kyçe rajonale, thanë të shtunën burime të Ministrisë së Jashtme.
Gjatë vizitës së tij, Fidan pritet të takojë homologun iranian Abbas Araghchi dhe zyrtarë të tjerë të lartë.
Bisedimet do të përqendrohen në forcimin e strukturës institucionale të marrëdhënieve dypalëshe në kuadër të Këshillit të Bashkëpunimit në Nivel të Lartë, i themeluar në vitin 2014.
Fidan do të shqyrtojë gjithashtu përgatitjet për mbledhjen e nëntë të këtij këshilli, që do të mbahet nën udhëheqjen e Presidentit turk, Rexhep Taip Erdogan dhe Presidentit iranian, Masoud Pezeshkian. Diskutimet pritet të theksojnë rëndësinë e rritjes së bashkëpunimit dypalësh në siguri dhe kundërterrorizëm, si dhe përshpejtimin e projekteve të infrastrukturës për qendrat tregtare kufitare dhe lidhjet rajonale.
Ministri i jashtëm turk pritet të bëjë thirrje gjithashtu për rritjen e përpjekjeve të përbashkëta për të arritur objektivin e 30 miliardë dollarëve në tregti dypalëshe dhe të theksojë rëndësinë e ruajtjes së dialogut mes dy vendeve për të promovuar stabilitetin rajonal.
Leave a Reply