Presidenti i Turqisë, Rexhep Taip Erdogan, tha se Izraeli e ka shkelur në mënyrë të përsëritur armëpushimin në Gaza mbi “arsye të fabrikuara”, duke paralajmëruar se veprime të tilla minojnë përpjekjet për të ruajtur këtë armëpushim të brishtë. Duke folur në ceremoninë e Çmimeve të Përhapjes së Shkencës në lstanbul, Erdogan tha se Hamas po i përmbush detyrimet e tij “me durim”, pavarësisht provokimeve të vazhdueshme izraelite.
Erdogan gjithashtu kritikoi ashpër mediat ndërkombëtare për mosraportimin e duhur të vrasjes së kolegëve të tyre në Gaza. “Mbi 270 gazetarë janë vrarë në Gaza, ndërsa organizatat e mëdha mediatike botërore qëndrojnë të heshtura”, tha ai, në kuadër të “Ditës Ndërkombëtare të Solidaritetit me Popullin Palestinez”.
Deklaratat e tij erdhën ndërsa Turqia shënoi Ditën Ndërkombëtare të Solidaritetit me Popullin Palestinez, me Ankaranë që rikonfirmoi atë që e quan mbështetje të palëkundur për të drejtat dhe shtetësinë palestineze. Erdogan tha se injorimi i gjenocidit të Izraelit do të barazohej me bashkëpunim në kryerjen e tij.
“Të injorosh ose të heshtësh për gjenocidin e Izraelit në Gaza nënkupton ta ndihmosh dhe ta mundësosh atë”, tha ai.
“Ne kurrë nuk kemi mbetur të heshtur për kauzën palestineze, dhe kurrë s’do të heshtim”, shtoi Erdogan, duke përsëritur pozicionin e kahershëm të Ankarasë.
Leave a Reply