Kreu i Vatikanit, Papa Leoni XIV, tha se Selia e Shenjtë mbështet prej shumë kohësh zgjidhjen me dy shtete për çështjen izraelito-palestineze dhe e konsideron këtë zgjidhjen e vetme që mund të ndalë konfliktin. Ai theksoi se Izraeli aktualisht nuk e pranon këtë mekanizëm, por se duhet punuar drejt një marrëveshjeje që siguron drejtësi për të dyja palët.
Duke folur për gazetarët në avion, pasi u largua nga Turqia për në Liban, Papa bëri një vlerësim të vizitës së tij të parë zyrtare jashtë vendit që nga zgjedhja në maj. Papa falënderoi presidentin turk, Rexhep Taip Erdogan për mikpritjen, duke thënë: “Dëshiroj të falënderoj veçanërisht Presidentin Erdogan. Vizita ishte e mrekullueshme”.
Ai tha se udhëtimi i tij në Turqi dhe më pas në Liban kishte temën e të qenit një “i dërguar i paqes” dhe synonte nxitjen e dialogut në një rajon të brishtë.
Papa theksoi se Turqia, edhe pse vend me shumicë myslimane, është shtëpi për shumë komunitete të krishtera dhe kultura që bashkëjetojnë në paqe. “Kjo është ajo që i duhet botës sot: njerëz të feve dhe etnive të ndryshme që jetojnë së bashku në paqe. Turqia duhet të jetë frymëzim për botën.”
I pyetur nga gazetarët për temat e diskutuara me Presidentin Erdogan, Papa tha: “Folëm për Gazën dhe Ukrainën. Türkiye mund të luajë një rol shumë të rëndësishëm në çështjen palestineze”. Ai nënvizoi se Selia e Shenjtë ka tentuar të jetë “zë ndërmjetësues” mes palëve për drejtësi dhe paqe.
Papa kujtoi përpjekjet e mëparshme të Erdoganit për të ndërmjetësuar midis Kievit dhe Moskës: “Kur lindi mundësia e dialogut mes Ukrainës dhe Rusisë disa muaj më parë, Presidenti Erdogan luajti rol kyç. Sot shohim sërish propozime konkrete për paqe”.
Ai shtoi se lidhjet e Erdoğanit me presidentët Zelenski, Putin dhe Trump mund të ndihmojnë në: nxitjen e dialogut, hapat drejt një armëpushimi, gjetjen e rrugëve për përfundimin e luftës në Ukrainë.
Leave a Reply