Forcat e Armatosura të Shqipërisë kremtojnë sot 113-vjetorin e krijimit. Shefi i Shtabit të Përgjithshëm, gjeneral-lejtnant Arben Kingji, tha se 4 dhjetori është një ditë që lidh historinë me detyrën dhe detyrën me të ardhmen. “Një ditë reflektimi, mirënjohjeje dhe angazhimi të ri ndaj misionit tonë kushtetues, atë të mbrojtjes së sovranitetit dhe sigurisë së qytetarëve tanë”, tha Kingji.
Kingji vlerësoi me mirënjohje kontributin e 26 pararendësve, nga Shtatmadhoria e Ali Shefqet Shkupit e deri te shefat e mëvonshëm të Shtabit të Përgjithshëm. “Gjatë këtyre 113 viteve, ushtria jonë ka kaluar periudha lufte, pushtimi, rezistence, tranzicioni dhe reformimi. Sot, 81 vite pas Çlirimit të vendit nga pushtuesit dhe 16 vite pas anëtarësimit në NATO, ne gëzojmë sigurinë kolektive të Aleancës më të suksesshme të historisë moderne dhe një pozicion të besueshëm në familjen euroatlantike. Jam krenar për çdo repart e njësi, për çdo stërvitje e mision të përmbushur, dhe për çdo standard të ri që kemi ngritur së bashku. Faleminderit për disiplinën, përkushtimin dhe seriozitetin tuaj në shërbimin e përditshëm, në detyrat brenda dhe jashtë vendit”, tha Kingji.
Leave a Reply