Suedia njoftoi se do t’i japë fund ndihmës së saj për Zimbabvet, Tanzaninë, Mozambikun dhe Liberinë dhe do të mbyllë tre ambasada në mënyrë që të lirojë fonde për Ukrainën, e cila është në luftë me Rusinë. Bolivia është gjithashtu në listë.
“Ambasadat suedeze në Bolivi, Liberi dhe Zimbabve, ku ndihma për zhvillim ishte aktiviteti kryesor, do të mbyllen”, tha ministri suedez për Bashkëpunim Ndërkombëtar, Benjamin Dousa.
Këto ndryshime do të zbatohen gradualisht dhe do të hyjnë në fuqi vitin e ardhshëm. “Qeveria planifikon të rrisë ndihmën për Ukrainën me të paktën 10 miliardë korona (afërsisht 913 milionë euro) (…) Kjo do të thotë që tani po i kushtojmë pothuajse 20% të ndihmës sonë totale kësaj kauze specifike”, theksoi Dousa.
Gjatë 25 viteve të fundit, ndihma suedeze për këto katër vende afrikane ka tejkaluar 50 miliardë korona.
Vendi skandinav, një donator bujar i ndihmës për zhvillim që nga vitet 1970, ka pësuar një ndryshim që nga zgjedhjet e vitit 2022 të një qeverie konservatore të mbështetur nga një parti e ekstremit të djathtë, antimigracion.
Leave a Reply