Ukraina do të ndajë me Shtetet e Bashkuara sot (e martë) planin e rishikuar të paqes për t’i dhënë fund luftës së Rusisë, pas bisedimeve në Londër mes presidentit ukrainas, Volodimir Zelenski, dhe liderëve të Francës, Gjermanisë dhe Britanisë. Kievi, nën trysni nga Shtëpia e Bardhë për ta pranuar sa më shpejt një marrëveshje paqeje, po kërkon ta barazpeshojë një draft të mbështetur nga SHBA-ja, i cili shihet nga shumë si i leverdishëm për Moskën.
Takimi i organizuar me nxitim midis kryeministrit britanik, Keir Starmer, presidentit francez, Emanuel Makron, kancelarit gjerman, Friedrich Merz, dhe Zelenskit, kishte për qëllim forcimin e pozicionit të Ukrainës.
Zelenski u tha gazetarëve pas takimit me liderët evropianë se plani i rishikuar përbëhet nga 20 pika, por se ende nuk ka marrëveshje për çështjen dorëzimit të tokave, që është kërkesë e madhe e Moskës.
“Qëndrimi i amerikanëve, në parim, është gjetja e një kompromisi”, tha ai. “Natyrisht, ka çështje të ndërlikuara që lidhen me tokat, dhe ende nuk ka kompromis për këtë”, theksoi Zelenski.
Ai e përsëriti qëndrimin e tij të njohur se Ukraina nuk mund të heqë dorë nga asnjë pjesë e tokës së vet.
Leave a Reply