Osmani pret Begajn: Kosovë-Shqipëri, bashkëpunim i pandalshëm

Presidentja e Kosovës, Vjosa Osmani, ka zhvilluar një takim miqësor për këtë fundvit me presidentin e Shqipërisë, Bajram Begaj.

Përmes një postimi në Facebook, Osmani ka bërë të ditur se biseda është fokusuar në forcimin e bashkëpunimit mes dy shteteve dhe rëndësinë që Kosova dhe Shqipëria të qëndrojnë gjithmonë pranë njëra-tjetrës.

“Në një takim të ngrohtë fundvitit, sot pata kënaqësinë ta pres Presidentin e Shqipërisë, Bajram Begaj, me të cilin biseduam për bashkëpunimin tonë të pandalshëm dhe nevojën që Kosova dhe Shqipëria të jenë gjithmonë pranë njëra-tjetrës”, ka shkruar Osmani.

Ajo ka shtuar se, në prag të festave të fundvitit, ka përcjellë urimet më të përzemërta për Presidentin Begaj, duke shprehur dëshirën që viti i ardhshëm të sjellë më shumë afërsi, bashkëpunim dhe hapa të suksesshëm drejt integrimit evropian për të dy vendet.