Tajlanda dhe Kamboxhia kanë rënë dakord të ndërpresin të gjitha luftimet duke filluar nga sot (e shtunë), njoftoi presidenti amerikan, Donald Trump, sipas “The Guardian”. Presidenti Trump tha se udhëheqësit tajlandezë dhe kamboxhianë kishin rënë dakord të rifillonin armëpushimin pas disa ditësh përleshjesh vdekjeprurëse.
Trump njoftoi marrëveshjen për të rifilluar armëpushimin në një postim në rrjete sociale – pas bisedave telefonike me kryeministrin tajlandez, Anutin Charnvirakul dhe kryeministrin kamboxhian Hun Manet.
“Tajlanda dhe Kamboxhia kanë rënë dakord të ndërpresin të gjitha të luftimet – që nga kjo mbrëmje dhe t’i rikthehen Marrëveshjes origjinale të Paqes – së arritur me ndërmjetësimin tim – dhe ndihmën e kryeministrit të madh të Malajzisë, Anwar Ibrahim”, tha Trump në “Truth Social”>
Armëpushimi fillestar në korrik u ndërmjetësua nga Malajzia dhe u vazhdua nga presioni i Trump, i cili kërcënoi të mos i pranonte privilegjet tregtare nëse Tajlanda dhe Kamboxhia nuk do të binin dakord.
Ai u formalizua më hollësisht në tetor në një takim rajonal në Malajzi ku mori pjesë edhe presidenti i SHBA-së, Donald Trump.
Pavarësisht marrëveshjes, të dy vendet vazhduan një luftë të ashpër propagandistike.
Rrënjët e konfliktit kufitar midis dy vendeve burojnë kryesisht nga një hartë e vitit 1907 – e krijuar ndërsa Kamboxhia ishte nën sundimin kolonial francez, të cilën Tajlanda pretendon se është e pasaktë.
Leave a Reply