Mbështetësit e fitueses iraniane të Çmimit Nobel për Paqe, Narges Mohamadi, thanë se nuk ka pasur asnjë kontakt me të që nga arrestimi i saj të premten, duke i bërë thirrje Republikës Islamike ta lirojë aktivisten, së bashku me dhjetëra persona të tjerë të arrestuar me të. Mohammadi, fituese e Çmimit Nobel 2023, u ndalua pasi foli në një ceremoni përkujtimore në qytetin lindor Mashhad për avokatin Khosrow Alikordi, i cili u gjet i vdekur në fillim të këtij muaji.
Sipas prokurorit të Mashhadit, Hassan Hemmatifar, 38 persona u arrestuan gjatë ceremonisë, përfshirë Mohammadin dhe aktivisten e njohur Sepideh Gholian
Mohammadi, e cila ka kaluar pjesën më të madhe të dekadës së fundit duke hyrë e dalë nga burgu, ishte liruar përkohësisht nga burgu në dhjetor 2024 për arsye shëndetësore. Gjatë vitit të fundit, ajo ka vazhduar aktivitetin e saj si aktiviste.
Që nga arrestimi, Mohammadi nuk ka bërë asnjë telefonatë dhe “vetëm një numër i kufizuar i të arrestuarve kanë mundur të kontaktojnë familjet e tyre”, thuhet në një deklaratë të fondacionit të saj.
Fondacioni shprehu “shqetësim të thellë për mirëqenien fizike dhe psikologjike të të gjithë të ndaluarve” dhe bëri thirrje për “lirimin e tyre të menjëhershëm dhe pa kushte”.
Ai tha se kishte mësuar se çështja e Mohammadi-t i ishte referuar prokurorisë revolucionare të Mashhadit dhe se ajo mund të përballet me akuza për sigurinë kombëtare. Megjithatë, fondacioni nënvizoi se nuk ka marrë asnjë informacion për “vendndodhjen apo gjendjen” e saj.
Leave a Reply