Mijëra njerëz pritet të dalin ë rrugët e Bukureshtit dhe qyteteve të tjera – në ditën e gjashtë të protestave – që kërkojnë pastrimin e gjyqësorit rumun dhe për të mbështetur gjyqtarët dhe prokurorët që denoncojnë abuzimet sistemike, sipas “Reuters”. Rreth 700 gjyqtarë dhe prokurorë rumunë kanë nënshkruar një letër ankese të hapur në media sociale duke u ankuar për mosfunksionimin e sistemit të drejtësisë. Presidenti Nicusor Dan u përgjigj duke njoftuar se do të zhvillonte konsultime me anëtarët e gjyqësorit më 22 dhjetor.
“Kur ankohen kaq shumë magjistratë për një problem integriteti në sistemin e drejtësisë, gjërat janë shumë serioze”, tha Dan.
Letra e ankesës erdhi pasi media e pavarur “Recorder” transmetoi një dokumentar javën e kaluar – që pretendonte se kryetarët e gjyqtarëve – të cilët mbështeten politikisht – përdornin boshllëqe ligjore për praktika joetike – duke përfshirë lirime të dyshimta, dhe se gjyqtarët apo prokurorët që ankoheshin – shpesh përballeshin me masa disiplinore.
Gjyqtarët në organin mbikëqyrës gjyqësor të Rumanisë thanë se dokumentari ishte një përpjekje për të destabilizuar sistemin e drejtësisë.
Rreth 10,000 njerëz marshuan në Bukuresht dje në mbrëmje duke brohoritur “Drejtësi jo korrupsion”. Mijëra protestues u mblodhën gjithashtu në qytete të tjera anembanë Rumanisë.
Ekspertët ligjorë thanë se një sërë ndryshimesh në vitin 2022 – që u dhanë kryegjyqtarëve të organit mbikëqyrës gjyqësor kompetenca të pakontrolluara mbi vartësit e tyre – hapën rrugën për abuzimet për të cilat gjyqtarët ankohen tani.
Leave a Reply