Kryeministri britanik Keir Starmer i ka dërguar një mesazh të drejtpërdrejtë oligarkut rus Roman Abramovich, duke paralajmëruar se koha po mbaron, që ai të dhurojë për Ukrainën të ardhurat nga shitja e klubit të futbollit ”Chelsea”. Duke folur në parlament, Starmer tha se ministrat kanë lëshuar një licencë që lejon transferimin e të ardhurave nga shitja e ”Chelsea”-t në një fondacion të ri, i cili do të financojë qëllime humanitare në Ukrainë.
”Mesazhi im për Abramovichin është ky: ora po kalon. Respekto zotimin që ke marrë dhe paguaj tani. Nëse jo, jemi të gatshëm të shkojmë në gjykatë që çdo qindarkë të arrijë tek ata, jetët e të cilëve janë shkatërruar nga lufta e paligjshme e Putinit”, tha Starmer.
Abramovich e shiti ”Chelsea”-n në maj 2022, pasi ndaj tij u vunë sanksione pas pushtimit të Ukrainës nga Rusia.
Ai ishte zotuar se të ardhurat nga shitja do t’u dhuroheshin ukrainasve, por deri tani nuk është arritur një marrëveshje me qeverinë britanike për mënyrën e transferimit dhe fondet mbeten të ngrira.
Downing Street tha se Abramovich ka kundërshtuar këmbënguljen e qeverisë që paratë të shpenzohen ekskluzivisht në Ukrainë.
Vendimi i sotëm për dhënien e licencës synon ta detyrojë atë të përmbushë premtimin, përpara se qeveria të ndërmarrë veprime ligjore.
Leave a Reply