Një mjet ajror pa pilot (UAV), që besohet të jetë me origjinë ruse, është gjetur në lagjen Çubuklubala në rrethin e Izmitit, në provincën veriperëndimore të Kocaelit në Turqisë, sipas Ministrisë së Brendshme turke. Në një deklaratë të premten, Ministria tha se UAV-ja vlerësohet të jetë modeli Orlan-10, që zakonisht përdoret për qëllime zbulimi dhe vëzhgimi.
Ministria shtoi se është duke u zhvilluar një hetim për incidentin.
Mediet turke raportuan se droni ishte dëmtuar pas rrëzimit.
Incidenti ndodhi pasi Turqia rrëzoi një dron të hënën që kishte “humbur kontrollin” teksa i afrohej hapësirës së saj ajrore nga Deti i Zi.
Presidenti i Turqisë, Rexhep Taip Erdogan, ka paralajmëruar kundër kthimit të Detit të Zi në një “zonë përballjeje” mes Rusisë dhe Ukrainës, pas disa sulmeve në javët e fundit kundër anijeve në rajon.
Një anije turke u dëmtua javën e kaluar nga një sulm ajror rus pranë qytetit port ukrainas të Odesës, vetëm disa orë pasi Erdogan foli me presidentin rus Vlladimir Putin në kuadër të një samiti në Turkmenistan.
Leave a Reply