Presidenti rus Vladimir Putin është i gatshëm të zhvillojë bisedime me presidentin francez Emanuel Makron nëse ekziston vullnet i ndërsjellë politik, raportoi agjencia RIA, duke cituar zëdhënësin e Kremlinit, Dmitry Peskov. “Nëse ka vullnet të ndërsjellë politik, atëherë kjo mund të shihet vetëm pozitivisht”, tha Peskov të dielën, sipas RIA-s.
Makron tha këtë javë se beson që Evropa duhet t’i rikthejë kontaktet me Putinin për të ndihmuar në përfundimin e luftës në Ukrainë. “Besoj se është në interesin tonë si evropianë dhe ukrainas të gjejmë kuadrin e duhur për të rifilluar këtë diskutim” në javët në vijim, tha presidenti francez.
“Qoftë duke arritur një paqe të qëndrueshme dhe afatgjatë, me garancitë e nevojshme të sigurisë”, tha Macron gazetarëve në Bruksel, “ose do të duhet në javët e ardhshme të gjejmë mënyra që evropianët të rifillojnë një dialog të plotë me Rusinë, dhe me transparencë të plotë.”
Shumica e vendeve të BE-së, përveç Hungarisë dhe Sllovakisë, kanë ndërprerë komunikimin me Putinin që prej nisjes së luftës në Ukrainë.
Macron zhvilloi një telefonatë dy-orëshe me Putinin në korrik, e para në tre vjet, gjatë së cilës bëri thirrje për armëpushim në Ukrainë, por biseda pati pak ndikim të dukshëm në konflikt.
Blloku ka interes të gjejë kuadrin e duhur për t’u përfshirë sërish në bisedime me Rusinë, tha Makron, përndryshe udhëheqësit e tij rrezikojnë të mbeten duke biseduar mes tyre dhe “me negociatorë që do të jenë të vetmit që do të flasin me rusët”.
Leave a Reply